बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास (बिमस्टेक) सम्मेलनका लागि सडक मर्मत गर्दा वर्षभरिको बजेट सकिएको छ । चालू आर्थिक वर्षको २ महिनामै बजेट करिब सकिदा वर्षभरिको काममा प्रभाब पारेको छ । दुई महिनाअघि बिमस्टेकका लागि सडक विभाग र विभिन्न स्थानीय तहले सडक मर्मत तथा रंग–रोगन गरेका थिए । भदौ १४ र १५ गते सम्पन्न सम्मेलनमा सडक विभागले नियमित कार्यअन्तर्गत ५ करोड रुपैयाँ खर्च गरेको थियो ।

सम्मेलनमा आएका पाहुनलाई देखाउन गरिएको सडक मर्मतमै चालू आर्थीक वर्षका लागी छुट्टाएको रकम सकिएको सकड बिभागका अधिकारीहरुले बताएका छन् । सडक मर्मतका लागी चालु आर्थिक वर्षमा काठमाडौं र ललिपुरमा झण्डै ६ करोड रुपैयाँ छुट्टाइएको थियो ।बिमस्टेक सम्मेलनमानै ४ करोड बढी रकम खर्च भईसकेकोले बाँकी रहेको रकमले वर्षभरी मर्मत गर्न नपुग्ने सडक विभागका महानिर्देशक रविन्द्रनाथ श्रेष्ठले बताए ।

‘सडक विभागको नियमित कार्यअन्तर्गत भएको ४ करोडको ठेक्कामध्ये ८० प्रतिशत खर्च बिमस्टेकमा सकियो,’ उनले भने । बिमस्टेकका लागि सडक विभागले करिब १ करोड २० लाख खर्च गरेको जनाएको छ । वर्षभरी सडक टाल्ने बजेटको ८० प्रतिशत बिमस्टेक सम्मेलनको क्रममा नै सकिएपछि आउँदो असारसम्म सडक मर्मत गर्न खर्चको अभाव हुने भएको छ । बिमस्टेक सम्मेलनका क्रममा टालिएका कतिपय ठाउँमा भत्किन सुर भएको छ । काठमाडौंका सबै सडक सुधार गर्न तत्काल २ करोड रुपैयाँ खर्च लाग्ने महानिर्देशक श्रेष्ठले बताए ।

उनका अनुसार काठमाडौंका सडकको खाल्डा पीच गर्न र भित्री सडकहरु मर्मत गर्न कम्तिमा दुई करोड लाग्ने छ । खानेपानी ढललगायतका निकायले सडक खन्दै जाने र सडक विभागले टाल्दै जाने हो भने अझ धेरै रकम आवश्यक पर्ने विभागका अधिकारी बताउँछन् । बिमस्टेक सम्मेलनका क्रममा सडक मर्मत गर्न कति खर्च भयो भन्ने विवरण अहिलेसम्म विभागमा पुगेको छैन । ‘चाडपर्वका कारण कति खर्च भयो त्यो विवरण आउँन र कतिपय रकम भुक्तानि गर्न समेत बाँकी छ’ उनले भने ।

महानिर्देशक श्रेष्ठले सडकको समस्या समाधान गर्न खानेपानी मन्त्रालयलाई समेत पत्रचार गरिएको बताए । खानेपानी मर्मत गर्नका लागि पीच गरिएको सडक खन्ने गरेकाले विभागले खानेपानी मन्त्रालयलाई पत्रचार गरेको हो । बिमस्टेक सम्मेलनका क्रममा हतारमा गुणस्तरहीन काम भएको भन्दै विरोध भएको थियो । बिमस्टेकको समयमा खर्च धेरै हुँदा सडक मर्मत नहुने देखिएको छ ।