नेपाल पत्रकार महासंघले मिडिया काउन्सिलसम्बन्धी संसदमा दर्ता भएको विधेयक फिर्ता लिन माग गरेको छ । महासंघले शुक्रबार विज्ञप्ति जारी गर्दै विधेयकको पुनः मस्यौदा गर्नु माग गरेको हो ।

विधेयकका प्रावधानहरुले मिडिया काउन्सिल सरकार नियन्त्रित अंगका रुपमा स्थापित हुनुका साथै स्वतन्त्र पत्रकारितामाथि अंकुश लगाउने महासंघको विज्ञप्तिमा उल्लेख छ ।

सञ्चार तथा सूचना प्रविधि मन्त्रालयले प्रेस काउन्सिललाई विस्थापन गर्ने गरी मिडिया काउन्सिल स्थापना गर्ने व्यवस्था सहितको विधेयक संसदमा दर्ता गराएको छ । महासंघले विधेयक फिर्ता लिन माग गर्दै दवाब मुलक कार्यक्रम पनि तय गरेको छ ।

सरोकार पक्षसमेतको छलफल र सहमतिमा संविधानको मूल भावना, प्रेस तथा अभिव्यक्ति स्वतन्त्रता सम्बन्धी अन्तर्राष्ट्रिय मूल्य, मान्यताका आधारमा विधेयक ल्याइनुपर्ने महासंघको माग छ ।

प्रकाशित समय : १३:४१ बजे