गृहपृष्ठ हजुरआमाको देहान्त काखको नाति सुरक्षित
हजुरआमाको देहान्त काखको नाति सुरक्षित
अल्बानियामा मंगलबार बिहान आएको ६.१ रेक्टर स्केलको भूकम्पमा १८ जना मरेका छन् । भूकम्पको केन्द्र अल्बानियाको राजधानी तिरानादेखि ३४ किलोमिटर पर उत्तर-पश्चिममा थियो ।
उद्धारकर्मीहरूले अल्बानियाका सञ्चार माध्यमलाई बताएअनुसार एक मृतक महिलाले काखमा राम्ररी च्यापेर नातिचाहिँ ज्यान जोगाएकी छन् ।
बिबिसीका अनुसार बिहानको भूकम्पको केही घण्टापछि बोसनियाको मोस्टारमा पनि भूकम्प आयो । त्यहाँ भएको क्षतिको विवरण आएको छैन । अल्बानियाका प्रधानमन्त्री एडी रामाले ट्विटरमा लेखेका छन्, ‘हामी पीडितका साथमा छौं । प्रभावित क्षेत्रका मानिसलाई सहयोग गर्ने प्रयास गर्दै छौं ।’
अल्बानियाका स्थानीय सञ्चार माध्यमका अनुसार ६ सय मानिसको अस्पतालमा उपचार हुँदै छ । विद्यालयहरूमा छुट्टी गरिएको छ । भूकम्पपछि उद्धार कार्य युद्धस्तरमा जारी छ । सेना, प्रहरी र आकस्मिक उद्धारकर्ताले भग्नावशेषबाट मानिसलाई निकाल्दै छन् ।
भग्नावशेषमा धेरै मानिस च्यापिएका छन् । अधिकारीहरूका अनुसार हालसम्म भग्नावशेषबाट ४२ जनाको उद्धार गरिएको छ । कुर्बिनमा भूकम्पपछि डराएर घरबाट हामफाल्दा एक जनाको ज्यान गएको छ ।
यो भूकम्प धेरै वर्षपछिको शक्तिशाली मानिएको छ । अल्बानियामा सन् १९२३ मा भूकम्प आएको थियो । सन् १९७९ मा ६.९ को भूकम्प आउँदा १३६ को ज्यान गएको थियो भने करिब एक हजार मानिस घाइते भएका थिए ।
प्रकाशित समय : १८:०९ बजे
