बागमती– मकवानपुरको बकैया गाउँपालिका–६, तल्लो ज्यामिरेका जमिन चिरा परेर प्रभावित स्थानीयवासीले यस वर्षको दसैँ अस्थायी आवासमै मनाएका छन् ।

लगातारको वर्षापछि गत असोज ११ गते जमिन चिराचिरा परेपछि यहाँको गरगरे बस्तीका आठ घर पूर्ण रूपमा क्षतिग्रस्त भएका थिए । प्रभावित परिवारलाई अस्थायी रूपमा बसोबास गर्न स्थानीय प्रशासनले टेन्ट तथा पाल उपलब्ध गराएको थियो ।

बस्तीमा जमिन चिरा परेर प्रभावित भएका ८० घरधुरीलाई सुरक्षित स्थानमा स्थानान्तरण गर्न स्थानीय तहले सिफारिससहित जिल्ला प्रशासनमा अनुरोध गरे पनि दसैँअघि स्थानान्तरण हुन नसकेपछि उनीहरूले अस्थायी आवासमै चाडपर्व मनाउनुपरेको बकैया–६ का वडाध्यक्ष फूलमान भोम्जनले बताए।

गाउँपालिकाका उपाध्यक्ष भक्तबहादुर खत्रीका अनुसार प्रभावित क्षेत्रमा कतिपय स्थानमा १२ फिटसम्म जमिन भासिएको छ । करिब दुई वर्ग किलोमिटर क्षेत्रका विभिन्न स्थानमा जमिन चिराचिरा परेको उनले जानकारी दिए ।

जमिन चिरा परेको सूचना प्राप्त हुनासाथ स्थानीयवासीलाई अस्थायी रूपमा सुरक्षित स्थानमा सारिएको उपाध्यक्ष खत्रीले बताए। प्रभावित परिवारका लागि तत्काल आवश्यक टेन्टलगायत सामग्री उपलब्ध गराइएको उनको भनाइ छ ।