काठमाडौं- संविधान दिवस २०८३ को अवसरमा नेपाल टेलिकमले आफ्ना ग्राहकका लागि विशेष डेटा अफर सार्वजनिक गरेको छ । टेलिकमले प्रिपेड तथा पोस्टपेड मोबाइल प्रयोगकर्तालाई लक्षित गर्दै दुई प्रकारका ‘अनलिमिटेड’ डेटा प्याकेज उपलब्ध गराउने भएको हो ।

नेपाल टेलिकमका अनुसार अफरअन्तर्गत ४९९ रुपैयाँमा ‘अनलिमिटेड लाइट’ र ६९९ रुपैयाँमा ‘अनलिमिटेड प्रो’ प्याकेज लिन सकिनेछ । ४९९ रुपैयाँको अनलिमिटेड लाइट प्याकेज अन्तर्गत ग्राहकले ३० दिनसम्म दैनिक ५ जीबी डेटा प्रयोग गर्न पाउनेछन् । दैनिक ५ जीबीको सीमा सकिएपछि पनि बाँकी समय २ एमबीपीएस गतिको अनलिमिटेड डेटा प्रयोग गर्न सकिने टेलिकमले जनाएको छ ।

त्यस्तै, धेरै डेटा प्रयोग गर्ने ग्राहकलाई लक्षित गर्दै ६९९ रुपैयाँको अनलिमिटेड प्रो प्याकेज ल्याइएको छ । यस प्याकेजमा ३० दिनसम्म दैनिक १० जीबी डेटा उपलब्ध हुनेछ । दैनिक १० जीबीको सीमा पूरा भएपछि बाँकी समय ३ एमबीपीएस गतिको अनलिमिटेड डेटा प्रयोग गर्न सकिनेछ ।

टेलिकमका अनुसार यी प्याकेजमा पोस्टपेड मोबाइल प्रयोगकर्ताका लागि लाग्ने रेन्टल शुल्कसमेत समावेश गरिएको छ । संविधान दिवसको अवसरमा ल्याइएको उक्त अफर असोज २ गतेदेखि असोज ४ गतेसम्म तीन दिन मात्र उपलब्ध हुनेछ ।

अफर लिन चाहने ग्राहकले आफ्नो मोबाइलबाट *1415*11# डायल गर्न सक्नेछन् । त्यसैगरी नेपाल टेलिकमको एपमार्फत पनि प्याकेज खरिद गर्न सकिने कम्पनीले जनाएको छ । नेपाल टेलिकमका प्रवक्ता कमल लामिछानेका अनुसार संविधान दिवसको अवसरमा ग्राहकलाई थप सुविधा उपलब्ध गराउने उद्देश्यले विशेष डेटा प्याकेज ल्याइएको हो ।

प्रकाशित समय : १७:५५ बजे