काठमाडौं ।  हिमालय अर्गनाइजेसनअन्तर्गत हिमालय मोटरोक्स प्रालिले नाइमा मोबिलिटी एक्सपोमा म्याक्सस ईटेरेन पिकअपका ४४ वटा बुकिङ भएको जनाएको छ । बुकिङमध्ये कम्फर्ट भर्सन ३६ वटा र प्रिमियम भर्सन ८ वटा छन् ।

कम्पनीले तीन साताअघि सार्वजनिक गरेको ईटेरेन कम्फर्ट भर्सनको मूल्य ८८ लाख रुपैयाँ तोकेको थियो । नाइमा मोबिलिटी एक्सपोको अवसरमा यसमा २ लाख रुपैयाँ छुट दिइएको थियो । त्यस्तै, १ करोड २८ लाख रुपैयाँ मूल्यको प्रिमियम भर्सनमा ५ लाख रुपैयाँ छुटको व्यवस्था गरिएको थियो ।

एक्सपो अवधिका लागि मात्रै घोषणा गरिएको छुट ग्राहकको आग्रहपछि भदौ १५ गतेसम्म कायम राखिएको कम्पनीले जनाएको छ । अफरमा सहभागी हुन चाहने ग्राहकले हात्तीसारस्थित म्याक्ससको सोरुममा पुगेर बुकिङ गर्न सक्नेछन् ।

‘परिवार र व्यवसायका लागि एउटै सवारी’ नारासहित बिक्री हुँदै आएको म्याक्सस पिकअप छोटो समयमै नेपाली बजारमा लोकप्रिय बन्दै गएको कम्पनीको दाबी छ । विशेषगरी कच्ची सडकमा यात्रा गर्ने, क्याम्पिङमा रुचि राख्ने तथा व्यावसायिक प्रयोजनका ग्राहकले यो सवारी रुचाएको कम्पनीले जनाएको छ ।

उच्च ग्राउन्ड क्लियरेन्स र सुविधायुक्त डिजाइनका कारण निर्माण तथा जलविद्युत् क्षेत्रमा समेत यसको प्रयोग बढ्न सक्ने कम्पनीको भनाइ छ । चीनको SAIC अन्तर्गतको Maxus कम्पनीले उत्पादन गरेको यो विद्युतीय पिकअपमा बिक्रीपछिको सेवा तथा स्पेयर पार्ट्स सहज रूपमा उपलब्ध गराइने हिमालय मोटरोक्सले जनाएको छ ।

प्रकाशित समय : ०७:०३ बजे