काठमाडौं । दक्षिण चीनको फोसानस्थित शताब्दीयौं पुरानो एक माछा मार्ने गाउँ अहिले कोइ माछाका कारण प्रमुख पर्यटकीय गन्तव्यका रूपमा विकास हुँदै गएको छ ।

कुनै समय सामान्य माछा मार्ने गाउँका रूपमा चिनिने उक्त क्षेत्र अहिले कोइ माछाका भित्तेचित्र, मूर्ति तथा आकर्षक पोखरीका कारण पर्यटकको रोजाइमा पर्न थालेको छ । गाउँमा कोइ माछासँग सम्बन्धित विभिन्न स्मरणीय सामग्री तथा पर्यटकीय गतिविधिसमेत सञ्चालनमा छन् ।

पर्यटकले कोइ माछासँग तस्बिर खिच्नुका साथै विभिन्न प्रजातिका कोइ माछा हेर्न र समात्न सक्ने व्यवस्था गरिएको छ । साथै स्थानीय परम्परागत तथा अमूर्त सांस्कृतिक सम्पदासँग जोडिएका परिकारको स्वाद लिन सक्ने अवसरसमेत पर्यटकले पाउने गरेका छन् ।

गाउँले कोइ माछासँग जोडिएको आफ्नो पहिचानलाई थप विस्तार गर्दै सांस्कृतिक पर्यटनसँगै व्यावसायिक उत्पादनमा समेत प्रयोग गर्न थालेको छ । गाउँको सांस्कृतिक पर्यटन विभागले हालै कोइ माछामा आधारित डिजिटल चित्रहरू तयार गरेको छ । ती डिजिटल सामग्री खेलौना तथा कपडा उत्पादन गर्ने कम्पनीहरूले खरिद गर्न थालेका छन् ।

फोसान सुहे कल्चरल टुरिजम डेभलपमेन्ट कम्पनीका सञ्चालन व्यवस्थापक लिउ जियाक्वानका अनुसार ‘सुकुन कोइ’ सिरिजअन्तर्गत कोइ माछामा आधारित आठवटा डिजिटल उत्पादन तयार गरिएको छ । ती उत्पादन अनलाइन बिक्रीमा राखिएपछि विभिन्न कम्पनीले लाइसेन्स लिएर उत्पादन तथा व्यावसायिक प्रयोग गर्न चासो देखाएका छन् ।

कोइ माछालाई शुभभाग्य र समृद्धिको प्रतीकका रूपमा लिइन्छ । पछिल्ला केही वर्षमा कोइ माछासँग जोडिएको पर्यटकीय गतिविधिले गाउँको आर्थिक गतिविधिलाई समेत उल्लेख्य रूपमा बढाएको छ । कोइ माछा केन्द्रित पर्यटनका कारण गाउँमा पर्यटकको आगमन बढेसँगै सामूहिक गाउँ आम्दानी लाखौं अमेरिकी डलरबराबर पुगेको जनाइएको छ । यसले स्थानीय संस्कृति संरक्षणसँगै गाउँको आयआर्जनमा समेत नयाँ अवसर सिर्जना गरेको छ । सीसीटीभी

प्रकाशित समय : १५:०३ बजे