गृहपृष्ठ केही स्थानमा आकस्मिक बाढीको जोखिम
केही स्थानमा आकस्मिक बाढीको जोखिम
हिजोदेखि भएको भारी वर्षाले दाङको देउखुरीस्थित भालुबाङ क्षेत्रमा देखिएको राप्ती नदीको बाढी । बगासोती बाढी मापन केन्द्रमा जलसतहले ६.२ मिटर सतह पार गरेको र बढ्दो क्रममा रहेको जल तथा मौसम विज्ञान विभागले जनाएको छ । दाङ र बाँके जिल्लाको नदी तटीय क्षेत्रमा सतर्कता अपनाउन समेत आग्रह गरिएको छ । तस्बिर ः कुलदीप न्यौपाने /रासस
काठमाडौँ । जल तथा मौसम विज्ञान विभागले आज केही जिल्लामा आकस्मिक बाढीको मध्यम जोखिम रहेको भन्दै सतर्कता अपनाउन आग्रह गरेको छ ।
कोशी, बागमती, गण्डकी र लुम्बिनी प्रदेशको पहाडी र तराई भू–भाग तथा मधेस प्रदेशको एक–दुई स्थानमा भारी वर्षाको पनि सम्भावना रहेको विभागले जनाएको छ ।
विभागका अनुसार हाल देशभर मनसुनी वायुको प्रभाव रहेको र मनसुनको न्यूनचापीय रेखा नेपालको पूर्वी भू–भागतर्फ सरदरभन्दा दक्षिणमा तथा पश्चिमी भू–भागतर्फ सरदर स्थानको आसपास अवस्थित रहेको छ ।
विभागका बाढीविद् विनोद पराजुलीले आज इलाम, झापा, तेह्रथुम, पाँचथर, धनकुटा, सप्तरी, सुनसरी, मोरङ, डोटी, डडेल्धुरा र आसपासका जिल्ला भई बहने स–साना नदीको बहाव उल्लेख्य बढ्ने र आकस्मिक बाढीको जोखिमको सम्भावना रहेको बताए ।
विभागका अनुसार गएको २४ घण्टामा देशका अधिकांश स्थानमा हल्कादेखि मध्यम वर्षा भएको छ । सबैभन्दा धेरै वर्षा कास्कीको याङ्जाकोटमा ९८।६ मिमी मापन गरिएको विभागले जनाएको छ ।
प्रकाशित समय : ११:०७ बजे
