भक्तपुर ।राष्ट्रिय कला सङ्ग्रहालयको ६६औँ स्थापना दिवसका अवसरमा ‘सङ्ग्रहालय सुरक्षा तथा व्यवस्थापनसम्बन्धी क्षमता अभिवृद्धि कार्यक्रम’ सम्पन्न भएको छ ।

भक्तपुर नगरपालिकाका नगरप्रमुख सुनिल प्रजापतिले उद्घाटन कार्यक्रममा २०७२ सालको भूकम्पले भक्तपुरका सम्पदामा ठूलो क्षति पु¥याए पनि भक्तपुर नगरपालिकाले पुनःनिर्माण कार्यलाई तीव्रता दिँदै आएको बताए । उनले भक्तपुर नगरपालिकामा हालसम्म १७८ सम्पदाको मौलिकता कायम राख्दै पुनर्निर्माण सम्पन्न गरिएको जानकारी दिए ।

राष्ट्रिय कला सङ्ग्रहालय ऐतिहासिक सङ्ग्रहालयको रूपमा रहेको र यसको अवलोकन गर्न स्वदेशी तथा विदेशीका आगमन तथा आकर्षण उत्तिकै बढिरहेको उल्लेख गर्दै नगरप्रमुख प्रजापतिले यसको संरक्षणका लागि नगरपालिका लागिरहको बताए । सम्पदा संरक्षणको मुख्य उद्देश्य नयाँ पुस्तालाई आफ्नो इतिहास, कला र संस्कृतिसँग परिचित गराउनुका साथै विदेशी पर्यटकलाई जानकारी गराउनुरहेको उनले बताए । नगर प्रमुख प्रजापतिले भक्तपुर नगरपालिकाले सम्पदा संरक्षण र पुनर्निर्माणलाई उच्च प्राथमिकतामा राखी काम गर्दै आएको बताउँदै ५५ झ्याले दरबारको पुनर्निर्माणका क्रममा भित्तेचित्रलाई सुरक्षित राख्दै पुनःस्थापना गरिएको जानकारी दिए।

नगरप्रमुख प्रजापतिले भक्तपुरलाई सम्पदाले भरिपूर्ण ऐतिहासिक नगरका रूपमा संरक्षण गर्ने लक्ष्यअनुसार नगरभित्र रहेका सबै संरचनालाई मौलिक शैलीमै पुनर्निर्माण गर्ने नीति अवलम्बन गरिएको बताए । यस क्रममा ९९ चोक संरक्षण र पुनर्जीवित गर्ने कार्य थालिएको बताए ।

पुरातत्व विभागका महानिर्देशक सौभाग्य प्रधानाङ्गले यहाँको सम्पदा र वास्तुकला मानव सभ्यताको उत्कृष्ट नमुना भएको बताउँदै यसको संरक्षण, संवद्र्धन तथा प्रवद्र्धन गर्दै नयाँ पुस्तासम्म हस्तान्तरण गर्नु सबैको साझा दायित्व भएको बताए । भक्तपुरका प्रमुख जिल्ला अधिकारी विनोदकुमार खड्काले भक्तपुर आफैँमा ऐतिहासिक तथा विश्वसम्पदा सूचीमा सूचीकृत नगर भएकाले यहाँको मौलिक संस्कृति र सम्पदाको संरक्षण सबैको साझा दायित्व भएको बताए ।

कार्यक्रममा राष्ट्रिय कला सङ्ग्रहालयकी प्रमुख जयन्ती श्रेष्ठ प्रधानले सङ्ग्रहालय स्थापना भएको इतिहासबारे जानकारी दिँदै पुरातात्त्विक महत्वका सामग्री सङ्कलन, संरक्षण र प्रदर्शनलाई निरन्तरता दिइएको बताए । उनले सङ्ग्रहालयमा चित्रकला, धातुकला, काष्ठकला, प्रस्तरकलालगायत करिब दुई हजार १०० पुरातात्विक वस्तु सङ्ग्रहमा रहेको बताए । इतिहासविद् प्रा डा पुरुषोत्तमलोचन श्रेष्ठले भक्तपुर खुला आकाशमुनि रहेको एउटा खुला सङ्ग्रहालयभएको चर्चा गर्दै कला सङ्ग्रहालयले शिलालेख तथा पुरातात्विक सम्पदाको संरक्षणमा अझ विशेष ध्यान दिनुपर्ने धारणा राख्े ।

इतिहासविद् विश्वमोहन श्रेष्ठले पुराना कला र संस्कृतिले तत्कालीन समाजको यथार्थ अवस्थाबारे जानकारी दिने भएकाले यस्ता सम्पदाको संरक्षण तथा जीवन्तता कायम राख्नु आवश्यक रहेको बताउनुभयो । राष्ट्रिय कला सङ्ग्रहालयको ६६औँ स्थापना दिवसको अवसरमा सङ्ग्रहालयमा कार्यरत कर्मचारीको ज्ञान, सीप र कार्यदक्षता अभिवृद्धि गर्ने उद्देश्यले क्षमता अभिवृद्धिका लागि प्रशिक्षण दिइएको थियो ।

प्रकाशित समय : १९:१२ बजे