काठमाडौं । स्वास्थ्य तथा खाद्य स्वच्छता मन्त्रालयको संगठन तथा व्यवस्थापन कार्य सम्पन्न भई संघीय पुल अन्तर्गत कूल १८ सय ८ दरबन्दी अन्तिम स्वीकृत भएको छ। भूमि व्यवस्था, सहकारी, संघीय मामिला तथा सामान्य प्रशासन मन्त्रालयबाट स्वीकृत भई उक्त दरबन्दीको सूची स्वास्थ्य मन्त्रालयमा प्राप्त भएको हो।

मन्त्रालयका अनुसार स्वीकृत भएका यी पदहरूमा अब छिट्टै लोक सेवा आयोगमार्फत चरणबद्ध रूपमा खुल्ला पदपूर्ति प्रक्रिया सुरु गरिनेछ।

मन्त्रालयमा पहिलेदेखि कायम रहेको मौजुदा ८३१ दरबन्दीमा यसपटक ९७७ नयाँ दरबन्दी थप गरिएको हो। योसँगै अब मन्त्रालयको संघीय पुल अन्तर्गत कूल दरबन्दी संख्या १८०८ कायम भएको छ। यस नयाँ संगठन संरचनामा विभिन्न विधाका विशेषज्ञ चिकित्सकहरूको दरबन्दीमा उल्लेखनीय वृद्धि गरिएको मन्त्रालयले जनाएको छ।

यो स्वीकृत सूची मन्त्रालयको ”संघीय पुल दरबन्दी” को संरचना मात्र हो। सिएमए, अहेब, अनमी लगायत प्राविधिक सहयोग तहका स्वास्थ्यकर्मीहरूको हकमा भने निकट भविष्यमै प्रदेश र स्थानीय तहहरूमा ठूलो संख्यामा दरबन्दी खुल्ने मन्त्रालयले जानकारी दिएको छ।

प्रकाशित समय : १६:५० बजे