सुर्खेत । नेपाली कांग्रेसका निवर्तमान कार्यवहाक सभापति पुर्णबहादुर खड्का तीन दिन देखि सुर्खेतमा छन् । नेपाली कांग्रेसमा देउवा पक्षको नेतृत्व खड्काले गरिरहेका छन् । पार्टीको बृहत् एकताका लागि भन्दै देउवा समूहले विभिन्न प्रदेशमा भेला आयोजना गरिरहेको छ ।

खड्काले शनिबार देउवा समूहको भेलालाई सम्बोधन गर्नेछन् । १४ औँ महाधिवेशनमा देउवा समूहको बाहुल्यता रहेको कर्णाली प्रदेश कार्य समितिले भेलाको आयोजना गरेको छ । यद्दपी यो भेलाको संयोजन गर्न कर्णालीका पुर्व मुख्यमन्त्री जीवन शाहीले जिम्मेवारी पाएका छन् ।

पार्टीको बृहत एकताका लागि भनिएको भेलामा पार्टीका सबै स्थानीय तहका जनप्रतिनिधि, प्रदेशसभा सदस्य, प्रतिनिधिसभा सदस्य, कर्णालीबाट प्रतिनिधित्व गर्ने वर्तमान र निवर्तमान केन्द्रीय सदस्य, सबै जिल्लाका पार्टीका पदाधिकारी र सुर्खेत जिल्लाका वडा तहसम्मका जनप्रतिनिधि, पार्टीका पदाधिकारी र भातृ तथा शुुभेच्छुक संस्थाका पदाधिकारीलाई बोलाईएको छ ।

देउवा समूहले बोलाएको भेलामा सहभागी हुने नहुने भन्ने बिषयमा जनप्रतिनिधि र पार्टि पदाधिकारिहरु अन्योलमा रहेका छन् । भेलामा सहभागिताका लागि प्रदेशसभाका सदस्यहरुलाई संसदीय दलमार्फत निर्देशनात्मक पत्राचार गरिएको र पार्टी पदाधिकारीलाई प्रदेश समितिमार्फत अनिवार्य उपस्थित हुन भनिएको छ ।

खड्काको गृह जिल्लामा हुन लागेको भेलामा सहभागिता देखाउन सुर्खेतका सबै कार्यकर्तालाई आउन सर्कुलर गरिएको छ । कार्यक्रमको दुई दिन अघि सुर्खेत आएका खड्काले कार्यकर्ता भेटघाट तीब्र बनाएको छन् ।

बैशाख २८ र २९ गते नेपाली काँग्रेसका सभापति गगन कुमार थापा, उपसभापती बिश्वप्रकाश शर्मा, महामन्त्री प्रदिप पौडेललगायतका नेताहरुले प्रदेशस्तरीय भेला गरेका थिए । त्यो भेलालाई चुनौती दिन देउवा समूहले भेला आयोजना गरेको हो ।

प्रकाशित समय : ०९:२२ बजे