काठमाडौं । सेयर बजार हेरफेर र संगठित कारोबार प्रकरणमा उद्योगी शेखर गोल्छा पक्राउ परेका छन्। केन्द्रीय अनुसन्धान ब्युरोले उनलाई बिहीबार काठमाडौंको नक्साल क्षेत्रबाट नियन्त्रणमा लिएको हो।

ब्युरो प्रमुख मनोज केसीका अनुसार जिल्ला अदालत काठमाडौंको अनुमति लिएर धितोपत्रसम्बन्धी कसुरमा गोल्छालाई पक्राउ गरिएको हो। उनी हिमालयन रिइन्स्योरेन्स लिमिटेडका तत्कालीन अध्यक्ष हुन्।

धितोपत्र बोर्डको प्रारम्भिक जाँचबुझ प्रतिवेदन, २०८३ ब्यूरोमा प्राप्त हुन आएकाले सोही आधारमा आजै काठमाडौँ जिल्ला अदालतबाट अनुमति लिइ पक्राउ गरिएको सिआइबीले जानकारी दिएको छ ।

बोर्डले तयार पारेको ‘धितोपत्र कारोबारसम्बन्धी प्रारम्भिक जाँचबुझ सुपरीवेक्षण प्रतिवेदन–२०८३’ का आधारमा गोल्छासहित ६ जनामाथि संगठित रूपमा सेयर मूल्य हेरफेर गरेको आशंका गरिएको छ।

सोही प्रतिवेदन अर्थ मन्त्रालयमार्फत प्रहरी प्रधान कार्यालय हुँदै सीआईबीमा पुगेपछि अनुसन्धान अघि बढाइएको हो। प्रतिवेदनअनुसार दीपक भट्ट नेतृत्वको समूहले दोस्रो बजारमा कृत्रिम माग सिर्जना गरी सूचीकृत कम्पनीहरूको सेयर मूल्य बढाउने काम गरेको उल्लेख छ। उक्त कारोबारमा गोल्छालाई ‘सहयोगी’को रूपमा राखिएको छ।

प्रकाशित समय : २०:५१ बजे