औषधीको मूल्य बढाएको आरोपमा औषधी व्यवस्था विभागका महानिर्देशक नारायणप्रसाद ढकाललाई स्वास्थ्य मन्त्रालय तानिएको छ।

प्रधानमन्त्री तथा मन्त्रिपरिषदको कार्यालयले औषधीको मूल्य वृद्धिको विषयमा छानबिन गर्न निर्देशन दिएसँगै ढकाललाई मन्त्रालय बोलाइएको हो।

प्रधानमन्त्री कार्यालयले स्वास्थ्य सचिवलाई पत्राचार गर्दै त्यस सम्बन्धमा छानबिन गर्न मन्त्रालयबाट विषयगत विज्ञको संलग्नतामा तीन सदस्यीय छानविन समिति गठन गर्न भनेको छ।

पत्रमा औषधिको मूल्य निर्धारण प्रक्रिया के हो, उक्त प्रक्रिया पूरा गरी काम भएको हो वा होइन, औषधिको मूल्य निर्धारणमा अनियमितता भएको भए कस कसको संलग्नता छ भन्ने लगायतका सम्पूर्ण विषय खुल्ने गरी छानबिन गरि ७ दिनभित्र प्रतिवेदन पेश गर्न पनि भनिएको छ।

प्रकाशित समय : १४:५५ बजे