काठमाडौं । बौद्ध तथा मेलम्ची घ्याङ गुठीले विविध धार्मिक तथा सांस्कृतिक कार्यक्रम आयोजना गर्ने भएको छ ।

शनिबार पत्रकार सम्मेलन गर्दै आउँदै गरेको २५७० औँ बुद्ध जयन्तीको पावन अवसरमा गुठीले वैशाख १५ गतेदेखि नै बुद्ध वचन (त्रिपिटक) पाठ–पूजा सुरु गरिने र वैशाख १८ गते विशेष कार्यक्रमको आयोजना गर्ने जनाएको छ ।

कार्यक्रमअनुसार वैशाख १८ गते बिहान ७ बजेदेखि विश्व शान्तिको नाममा पूजा–पाठ गरिनेछ ।

बिहान ९ बजेदेखि ऐतिहासिक गौतम बुद्ध मूर्ति, ८४ लाख देवी–देवताले समुद्घाटन गरेको मानिने कास्यप बुद्धको अस्तु तथा स्वयम्भूको अस्तु दर्शनार्थीका लागि बौद्ध तथा मेलम्ची घ्याङ गुठी गुम्बामा प्रदर्शनमा राखिनेछ ।

त्यसैगरी बिहान १०ः३० बजे विभिन्न देश–विदेशका कूटनीतिक प्रतिनिधि तथा प्रमुख अतिथिहरूलाई स्वागत गर्दै शान्तिको प्रतीक परेवाको जोडी उडाएर र दीप प्रज्वलनसहित कार्यक्रमको औपचारिक उद्घाटन गरिनेछ ।

११ः३० बजेसम्म औपचारिक कार्यक्रम सम्पन्न गरी भोजन विश्रामको व्यवस्था गरिएको छ ।

दिउँसो २ बजेदेखि ऐतिहासिक गौतम बुद्धको मूर्तिलाई बौद्ध महास्तूप परिसरमा विभिन्न धर्मावलम्बी गुरुहरू, संघसंस्थाहरू तथा परमपूज्य औतारी धर्मगुरु चिनियाँ लामा भूपति बज्र लामाको अगुवाइमा परिक्रमा गरिने कार्यक्रम रहेको गुठीले जनाएको छ ।

प्रकाशित समय : १९:०३ बजे