सत्तारुढ नेपाल कम्युनिष्ट पार्टी (नेकपा)ले सभामुखका लागि उम्मदेवार चयन गर्न नसकेपछि प्रतिनिधिसभाको बैठक आज पनि स्थगित भएको छ । प्रतिनिधिसभाको अर्को बैठक माघ ६ गतेका लागि सारिएको हो ।

यसअघि पुस ४ गते बसेको बैठक त्यसयता पटकपटक सूचना टाँस गरेर स्थगित हुँदै आएको छ । पुस ११, पुस १६ हुँदै पुस २७ लाई बैठक डाकिएको थियो ।

यसअघि सभामुख चयन गर्ने कार्यतालिका रहे पनि दलहरुबीच सभामुख कसलाई बनाउने भन्ने निर्णय हुन नसक्दा प्रतिनिधि सभाको बैठक बस्न सकेको छैन । नेकपाले उपसभामुखको राजीनामापछि मात्र सभामुख उम्मेदवारको टुंगो लगाउने भएको छ ।

उपसभामुखबाट शिवमाया तुम्बाहाम्फेले पनि सभामुखमा रुचि देखाएकी छन् । शनिबार दिउँसो प्रधानमन्त्री निवास बालुवाटारमा बसेको नेकपा सचिवालय बैठकले तुम्बाहाम्फेलाई राजीनामा गराउने निर्णय गरेको थियो । छलफलमा शिवमायाले ओली र प्रचण्डसमक्ष सभामुखका लागि आफ्नो योग्यताको सूची पेश गर्दै राजीनामा नदिने अडान राखेकी थिइन् ।

तत्कालीन सभामुख कृष्णबहादुर महरा बलात्कार आरोपमा थुनामा गएपछि सभामुख पद रिक्त छ ।संविधानको प्रावधानअनुसार सभामुख र उपसभामुख फरक-फरक दलको हुनुपर्ने व्यवस्था छ ।

प्रकाशित समय : १८:५१ बजे