माध्यमिक शिक्षा परीक्षा (एसइई) को पहिलो दिनमै उत्तरपुस्तिका व्यवस्थापनमा लापरबाही गरेको भन्दै जुम्लामा एक केन्द्राध्यक्ष र निरीक्षकलाई पदमुक्त गरिएको छ।

तातोपानी गाउँपालिका–५ स्थित दुर्गा मावि लाम्रा केन्द्रमा अंग्रेजी विषयको उत्तरपुस्तिका ‘हराएको’ र पछि अव्यवस्थित रूपमा भेटिएको पुष्टि भएपछि केन्द्राध्यक्ष मुकुन्दराज शर्मा र निरीक्षक हरिदेवी रावललाई कारबाही गरिएको हो।

उत्तरपुस्तिका हराएको हल्ला चलेपछि शिक्षा विकास तथा समन्वय इकाइ जुम्लाका प्रमुख रमेश लुवार नेतृत्वको टोलीले घटनास्थलमै पुगेर झण्डै सात घण्टा लामो अनुसन्धान गरेको थियो।

परीक्षाको विश्वसनीयतामाथि नै आँच आउने गम्भीर लापरबाही गरेको ठहर गर्दै समितिले दुवै जनालाई परीक्षा अवधिभर केन्द्रमा जान नपाउने गरी बर्खास्त गरेको हो।

सशस्त्र प्रहरी बलका एसपी देवबहादुर बोहरा र स्थानीय प्रहरी प्रमुखको रोहबरमा मुचुल्का उठाएर लाहाछाप लगाइएको उत्तरपुस्तिकाको पोको अनुसन्धान टोलीले खोलेको थियो।

प्रकाशित समय : २१:२१ बजे