काठमाडौं । आगामी अप्रिल ८, २०२६ अर्थात यही चैत्र २५ गते मा म्याड इन्टरटेनमेन्टले ठमेलस्थित विश्वप्रसिद्ध क्लब ‘एलओडी’मा चर्चित दुई संगीतका हस्तीलाई मन्चमा उतार्ने भएको छ ।

यस विशेष साङ्गीतिक यात्रामा दुई हस्तीहरू–बलिउडका दिग्गज गायक विनोद राठोड र नेपाली पप आइकन अनिश ओकिली एउटै मञ्चमा देखिनेछन् ।

बाजीगर’ र ‘दिवाना’ जस्ता चलचित्रका सदाबहार गीतहरूमा स्वर दिएका राठोडले ‘ऐसी दीवानगी’ र ‘छुपाना भी नही आता’ जस्ता गीतहरू प्रस्तुत गर्नेछन् ।

आयोजक संस्था म्याड इन्टरटेनमेन्टका संस्थापक मनिष अधिकारीका अनुसार राठोडसँगै नेपाली तन्नेरी पुस्ताका ढुकढुकी अनीश ओकिलीले ‘मेरी ओकेली’ र ‘गुलाबी जादू’ जस्ता आफ्ना चर्चित गीतहरूबाट दर्शकलाई नचाउनेछन् ।

साँझ ८ बजे सुरु हुने कार्यक्रममा व्यावसायिक ‘डीएनबी’ अडियोटेक्निक साउन्ड सिस्टम ३६० डिग्री स्टेज भ्यु सहितको क्लबमा ९० को दशकका सङ्गीत प्रेमीहरूले एक अविस्मरणीय साङ्गीतिक अनुभव दिलाउन लागेको अधिकारीले जानकारी दिए ।

‘यो नेपालका लागि दुर्लभ साङ्गीतिक कार्यक्रम हुनेछ । किनकि विश्वका उत्कृष्ट १०० क्लबहरूको सूचीमा ४४औँ स्थानमा रहेको एलओडीमा स्टार कलाकारहरूको साथमा यस्तो भव्य प्रस्तुति साँचै दुर्लभ र अविस्मरणीय बनाउने प्रयासमा छौँ,’ अधिकारीले भने ।

बलिउडका चर्चित गायक विनोद राठोडले सुपरस्टार कलाकारहरू शाहरुख खान, सलमान खान र सञ्जय दत्तको स्टारडम पछाडिको आवाज दिइसकेका छन् । उनको नेपाल यात्रालाई निकै अर्थपूर्ण रुपमा हेरिएको छ । नेपाल बसाइका क्रममा उनले पशुपतिनाथको दर्शन गर्नुका साथै विभिन्न स्थानहरुको भ्रमण समेत गर्नेछन् ।

करिब आठ बर्षपछि अमेरिकाबाट आएका अनिश भने निकै उत्साहित छन् । कार्यक्रमका लागि आयोजकले १५ सय र २ हजार रुपैंयाँ प्रवेश शुल्क तोकेको छ । टिकट विक्री धमाधम भइरहेको र सिमित संख्यामा टिकट बुक गर्न पाइने आयोजकले जनाएको छ ।

प्रकाशित समय : १२:०८ बजे