मधेश प्रदेशका मुख्यमन्त्री कृष्णप्रसाद यादवले १०० दिनमा ५१ वटा मुख्य काम अघि बढाएको दाबी गरेका छन् । मंगलबार मुख्यमन्त्री तथा मन्त्रिपरिषद्को कार्यालयमा आयोजित पत्रकार सम्मेलनमा उनले स्वास्थ्य, शिक्षा, कृषि, पर्यटन, सिँचाइ, भौतिक पूर्वाधार, खेलकुद, वन, यातायात र अर्थलगायत विभिन्न क्षेत्रमा काम सुरु गरिएको वा छलफलको चरणमा पुगेको बताए ।

उनका अनुसार सबैभन्दा उल्लेखनीय उपलब्धिका रूपमा जनकपुरधामको प्रादेशिक अस्पतालमा बिरामीहरूले घरबाटै मोबाइलमार्फत ओपीडी टिकट काट्न सक्ने डिजिटल सेवा लागू गरिएको छ, जसले भिड र समय दुवै घटाउने अपेक्षा गरिएको छ । किसानका लागि मलमा घटाइएको अनुदान पुनः पूर्ववत् बनाउन प्रदेश सरकारले संघीय सरकारसमक्ष प्रस्ताव पेस गरेको छ, जसलाई यसै वर्षदेखि लागू गर्ने तयारी छ ।

धार्मिक तथा पर्यटन प्रवर्द्धनतर्फ जनकपुरधामको जानकी मन्दिरलाई युनेस्कोको विश्व सम्पदा सूचीमा सूचीकृत गराउन आवश्यक प्रक्रिया अघि बढाइएको छ । साथै, रामजानकी रंगशालाको निर्माण कार्यलाई तीव्रता दिइएको छ ।

यातायात क्षेत्रमा ई–रिक्सा र ट्र्याक्टर चालकलाई प्रयोगात्मक परीक्षामार्फत लाइसेन्स दिने व्यवस्था सुरु गर्ने प्रक्रिया अघि बढाइएको छ । ‘एक निर्वाचन क्षेत्र, पाँच किलोमिटर सडक’ योजनाअन्तर्गत पहिलो चरण सम्पन्न भई दोस्रो चरणका लागि तयारी पूरा भएको छ ।