निर्वाचन आयोगले प्रतिनिधि सभा निर्वाचनको मतदान सम्पन्न भएको २४ घण्टाभित्र अन्तिम नतिजा सार्वजनिक गर्ने तयारी गरेको जनाएको छ । आयोगले मत गणनालाई तीव्र, पारदर्शी र विश्वसनीय बनाउने उद्देश्यसहित आवश्यक प्राविधिक तथा प्रशासनिक व्यवस्था मिलाइएको स्पष्ट पारेको छ ।

आयोगका कार्यवाहक प्रमुख आयुक्त रामप्रसाद भण्डारीले समयमै नतिजा सार्वजनिक गर्न मत पेटिका संकलनदेखि मतगणनासम्मको सम्पूर्ण प्रक्रिया छिटो र व्यवस्थित ढंगले सञ्चालन गरिने जानकारी दिए । ‘मतदान सम्पन्न भएलगत्तै मतपेटिका सुरक्षित रूपमा संकलन गरी गणना प्रक्रिया अघि बढाइने छ र सकेसम्म २४ घण्टाभित्र नतिजा प्रकाशन गरिने छ’, उनले बताए ।

प्रतिनिधिसभा सदस्यका लागि यही फागुन २१ गते मतदान हुँदैछ । २७५ सदस्यीय प्रतिनिधिसभामध्ये १६५ जना प्रत्यक्ष निर्वाचित हुनेछन् भने ११० जना समानुपातिक निर्वाचन प्रणालीमार्फत चयन गरिने छन् । आयोगले निर्वाचन प्रक्रियालाई स्वच्छ, निष्पक्ष र मर्यादित बनाउन सबै राजनीतिक दल, उम्मेदवार तथा मतदातासँग सहकार्यको अपेक्षा गरेको छ ।

निर्वाचन प्रचारप्रसारका लागि फागुन ४ गतेदेखि १८ गतेसम्म समय निर्धारण गरिएको थियो । आज फागुन १८ गते सोमवार राति १२ बजेदेखि मौन अवधि लागू हुने आयोगले जनाएको छ । मौन अवधि मतदान प्रक्रिया प्रारम्भ भएर सम्पन्न नहुँदासम्म कायम रहने छ ।

प्रकाशित समय : २१:०१ बजे