नेपाल सरकार, सञ्चार तथा सूचना प्रविधि मन्त्रालयअन्तर्गतको चलचित्र विकास बोर्डले स्वदेशी फिल्महरुको डिजिटाइजेशनका लागि आवेदन आह्वान गरेको छ ।

चावहिलस्थित विकास बोर्डले प्रकाशित गरेको सूचनाअनुसार सेलुलोइड प्रविधिमा निर्माण भई हालसम्म डिजिटल स्वरूपमा रूपान्तरण नगरिएका स्वदेशी फिल्मलाई डिजिटल माध्यममा सुरक्षित राखी संरक्षण तथा प्रवर्द्धन गर्ने उद्देश्यले यो कार्यक्रम सञ्चालन गर्न लागिएको हो ।

यस कार्यमा सहभागी हुन इच्छुक फिल्म निर्माता अथवा अधिकार प्राप्त व्यक्तिले सूचना प्रकाशित भएको मितिले २१ दिनभित्र बोर्डले तोकेको ढाँचामा आवेदन पेश गर्नु पर्नेछ ।

डिजिटाइजेशन प्रक्रियामा सहभागिताका शर्त, आवेदन फाराम तथा आवश्यक विवरण चलचित्र विकास बोर्डको आधिकारिक वेबसाइट www.film.gov.np तथा बोर्डको सूचना पाटीमा उपलब्ध रहेको जनाइएको छ ।

विकास बोर्डले स्वदेशी फिल्महरू नेपालको सांस्कृतिक तथा ऐतिहासिक धरोहर भएको उल्लेख बताउँदै डिजिटलाइजेशन अत्यावश्यक भएको जनाएको छ । डिजिटाइजेशनमार्फत त्यस्ता फिल्मको संरक्षण गर्नु आजको आवश्यकता भएको बोर्डको भनाइ छ ।

प्रकाशित समय : १२:३० बजे