युरोपिअन ब्रोडकास्टिङ युनियन ईबीयूले इजरायललाई सन् २०२६ को युरोभिजन गीत प्रतियोगितामा प्रतिस्पर्धा गर्न अनुमति दिएपछि चार युरोपेली देशले प्रतियोगिता बहिष्कार गर्ने घोषणा गरेका छन् । बहिष्कार गर्ने देशहरूमा आयरल्यान्ड, स्पेन, नेदरल्यान्ड्स र स्लोभेनिया रहेका छन् ।

गाजामा जारी युद्ध र साथै अनुचित मतदान अभ्यासको आरोपका कारण इजरायललाई प्रतियोगिताबाट बाहिर राख्न माग गर्ने देशहरूमध्ये यी चार देश पनि थिए । स्पेनको प्रसारक आरटीभीईले जेनेभामा भएको बैठकमा यो विषयमा गोप्य मतदान गराउन माग गरेको थियो । तर आयोजकहरूले सो अनुरोध अस्वीकार गरेपछि प्रतियोगिताको व्यवस्थापनप्रति ‘अविश्वास बढेको’ आरटीभीईले जनाएको छ ।

आयरल्यान्डको आरटीईले आफ्नो सहभागिता ‘गाजामा भइरहेको जीवनको भयावह क्षति र मानवीय सङ्कटले गर्दा अमानवीय’ हुने बताएको छ ।

मतदान विवाद र ‘बिग फाइभ’ को बहिष्कार
स्पेन युरोभिजनका ‘बिग फाइभ’ देशहरू फ्रान्स, जर्मनी, इटाली र बेलायत मध्ये एक हो । यी देशका कलाकारहरू सीधा फाइनलमा प्रवेश गर्न पाउँछन्, किनभने उनीहरूका प्रसारकहरूले ईबीयूलाई सबैभन्दा ठुलो आर्थिक योगदान दिन्छन् ।

बिहीबार ५० भन्दा बढी प्रसारकहरू वार्षिक रूपमा १५० मिलियनभन्दा बढी मानिसहरूले हेर्ने यो प्रतियोगिताको भविष्यबारे छलफल गर्न ईबीयूको बैठकमा सहभागी भएका थिए ।

बैठकमा इजरायलले यस वर्ष आफ्नो प्रतियोगी युभल राफेललाई अनुचित रूपमा मतदान अभियान चलाएर सहयोग गरेको आरोप लागेपछि सरकारहरू र तेस्रो पक्षहरूलाई उनीहरूका कलाकारहरूको लागि मतदान अभियान सञ्चालन गर्नबाट निरुत्साहित गर्न नयाँ नियमहरूलाई समर्थन गर्न भनिएको थियो ।

प्रकाशित समय : ०९:५८ बजे