सेनेगलका चेक साबालीले सिटी रंगशालामा घरेलु टोली इंग्ल्यान्डविरुद्ध इन्जुरी टाइममा गोल गरेर नयाँ इतिहास कोरे । सेनेगलको राष्ट्रिय टोलीमा यो नयाँ कीर्तिमान बन्यो ।

प्रशिक्षक पापे थियावको टोलीले इंग्ल्यान्डविरुद्ध ३–१ को पुनरागमन जित निकालेको थियो । यो कुनै पनि अफ्रिकी मुलुकले इंग्ल्यान्डविरुद्ध निकालेको पहिलो जित हो । यसअघि २२ पटकसम्म अफ्रिकाका कुनै पनि मुलुकले इंग्ल्यान्डविरुद्ध जित निकाल्न सकेका थिएनन् ।

इंग्ल्यान्डका प्रशिक्षक टुचेलको टोलीका लागि ह्यारी केनले सुरुवाती अग्रता दिलाए । तर, यो अग्रता लामो समय जोगाउन नसक्दा पाहुना टोलीले नतिजा आफ्नो पक्षमा ल्यायो ।

साबालीले तेस्रो गोल गर्नुअघि सेनेगलका स्माइला सार र हाबिब डाइराले समान एक गोल गरेका थिए ।

जितको हर्ष व्यक्त गर्दै कप्तान कालिडोउ कौलीबालीले भने, “यो रात रोमाञ्चक रात हो । आज केही विशेष गर्न सक्छौँ भन्ने हामीलाई विश्वास थियो । खेल प्रतिस्पर्धात्मक बनेको थियो । तर, हामीले आफ्नो स्तर देखायौँ ।”

कौलीबालीले उक्त जितलाई सेनेगलले जितेको सन् २०२२को अफ्रिका कपको उपाधिसँग तुलना गरे ।

“हामी निकै कम इतिहास बनाउँछौँ । यसअघि हामीले एफकोनको उपाधि जितेर इतिहास रचेका थियौँ । अहिले यहाँ पनि इतिहास बनायौँ । हामी सेनेगलको निरन्तर कथा लेख्न चाहन्छौँ,” उनले भने ।

सेनेगल सन् २०२४ को जनवरीदेखि अपराजित छ । टोली पछिल्लोपटक सन् २०२३ मा सम्पन्न अफ्रिका कप अफ नेसन्सको अन्तिम–१६मा आइभोरी कोस्टसँग पेनाल्टी सुटआउटमा पराजित भएको थियो ।

सोही वर्षको डिसेम्बरमा थाइवले टोलीको जिम्मेवारी सम्हालेका थिए । उनको प्रशिक्षणमा टोलीले दुई जित र दुई बराबरी खेलेको छ ।

प्रकाशित समय : १९:४९ बजे