श्रीलङ्काका क्याथोलिकहरूले सोमबार इस्टर बम विष्फोटको छैटौँ वार्षिकोत्सव मौन मार्च र न्यायको मागसहित मनाएका छन् ।

सन् २०१९ अप्रिल २१ मा तीन चर्च र तीनवटा होटललाई लक्षित गरी गरिएको बम विस्फोटको थुप्रै अनुसन्धानहरूले इस्लामिक स्टेट समूहसँग सम्बद्ध भएको दाबी गर्ने स्वदेशी जिहादीहरूले आक्रमण गरेको निष्कर्ष निकालेका थिए ।

यद्यपि यस मुलुकको क्याथोलिक चर्चले लगातारका सरकारहरूलाई आक्रमणको पछाडि रहेका मानिसहरूलाई जोगाएको आरोप लगाएको छ र धेरै उच्चस्तरीय अनुसन्धानहरूले सैन्य गुप्तचर एकाइहरू र बम विस्फोटकारीहरू बिचको सम्बन्ध पहिचान गरेको छ ।

श्रीलङ्काको चर्चका प्रमुख कार्डिनल माल्कम रञ्जितले राजधानी कोलम्बोमा मार्चको नेतृत्व गरे । मार्चमा उनले पीडितहरूका लागि बहु–धार्मिक समारोहको अध्यक्षता गरे जसमा ४५ विदेशी थिए ।

पीडितका सयौँ आफन्तले सेन्ट लुसिया क्याथेड्रलबाट नजिकैको सेन्ट एन्थोनी चर्चसम्म पदयात्रा गरे । त्यहाँ पहिलो आत्मघाती आक्रमण भएको थियो । देशभरका सबै रेडियो र टेलिभिजन च्यानलहरूले सम्मानको प्रतीकका रूपमा दुई मिनेटका लागि आफ्नो प्रसारण मौन गरे ।

भ्याटिकनले मारिएका एक सय ६७ क्याथोलिकलाई ‘आस्थाका साक्षीहरू’ का रूपमा मान्यता दिएको र उनीहरूलाई सम्भावित सन्तत्वको बाटोमा राखेको रञ्जितले घोषणा गरे । “यसको उद्देश्य साक्षीको स्मृतिलाई निरन्तर प्रचार र संरक्षण गर्नु हो”, उनले भने ।

राष्ट्रपति अनुरा कुमार दिसानायकेले वार्षिकीको पूर्वसन्ध्यामा सन् २०२१ को राष्ट्रपति जाँच आयोगको अन्तिम प्रतिवेदनको समीक्षा हुने बताइन । दिसानायकेको कार्यालयले आक्रमणमा संलग्नहरू विरुद्ध कारबाहीका लागि प्रहरीलाई प्रतिवेदन हस्तान्तरण गरिएको बताएको छ ।

चर्चका नेताहरूले राष्ट्रिय सुरक्षाको मञ्चमा अभियान चलाइरहेका सेवानिवृत्त सेना अधिकारी गोटाबाया राजपाक्षेको राजनीतिक सम्भावनालाई बलियो बनाउन सैन्य गुप्तचर अधिकारीहरूले बम विस्फोटको योजना बनाएको आरोप लगाएका छन् । राजपाक्षेले सात महिनापछि राष्ट्रपति पद जितेका छन ।

राजपाक्षेलाई सन् २०२२ जुलाईमा अभूतपूर्व आर्थिक सङ्कटका कारण खाद्यान्न, इन्धन र औषधिको अभाव भएपछि महिनौँको विरोध प्रदर्शनपछि पदबाट हटाइएको थियो ।