अमेरिकी विशेष दूत स्टिभ विटकफले रोक लगाउन आह्वान गरेपछि इरानले आफ्नो आणविक कार्यक्रमको एक हिस्साका रूपमा युरेनियमको संवर्धन ‘गैर–सम्झौता योग्य’ भएको विदेशमन्त्री अब्बास अराघचीले बुधबार बताएका छन।

“इरानको संवर्धन वास्तविक, स्वीकृत विषय हो । हामी सम्भावित चिन्ताहरूको जवाफमा विश्वास निर्माण गर्न तयार छौँ, तर संवर्धनको विषय गैर–सम्झौता योग्य छ”, अराघचीले मन्त्रिपरिषद्को बैठकपछि पत्रकारहरूलाई बताए ।

अमेरिकी राष्ट्रपति डोनाल्ड ट्रम्पले सन् २०१८ मा ऐतिहासिक आणविक सम्झौता त्याग्नुभएपछि लामो समयदेखि शत्रु रहेका दुई मुलुकबीच उच्चस्तरीय वार्ता भएको एक हप्तापछि शनिबार ओमानमा अराघची र विटकफले फेरि भेट्ने क्रममा यो टिप्पणी आएको हो ।

ट्रम्पले जनवरीमा कार्यालयमा फर्केपछि तेहरानविरुद्ध ‘अधिकतम दबाव’ को नीतिमा व्यापक प्रतिबन्धहरू फेरि लागू गरेका छन।

मार्चमा उनले इरानका सर्वोच्च नेता आयतुल्लाह अली खामेनीलाई वार्ताको आग्रह गर्दै पत्र पठाए तर वार्ताले सम्झौता ल्याउन नसकेमा सम्भावित सैन्य कारबाहीको चेतावनी पनि दिए ।

दुवै पक्षले शनिबारको बैठकलाई ‘रचनात्मक’ भएको बताए । तर मङ्गलबार विटकफले इरानले कुनै पनि आणविक सम्झौताको भागका रूपमा युरेनियमको संवर्धन ‘रोक्न र उन्मूलन’ गर्नुपर्ने बताए ।

शनिबारको वार्ताअघि ट्रम्प प्रशासनबाट बाहिर आएको ‘विरोधाभासी र परस्पर विरोधी स्थिति’ भन्दै अराघचीले निन्दा गरे।

“हामी वार्ता सत्रको समयमा अमेरिकीहरूको वास्तविक विचारहरू पत्ता लगाउनेछौँ”, उनले भने ।

इरानका शीर्ष कूटनीतिज्ञले सम्भावित सम्झौताको ढाँचामा वार्ता सुरु गर्ने आशा व्यक्त गर्नुभयो तर त्यसका लागि संयुक्त राज्य अमेरिकाबाट ‘रचनात्मक स्थितिहरू’ आवश्यक रहेको बताए ।

“यदि हामीले विरोधाभासी र परस्पर विरोधी स्थितिहरू (सुन्न) जारी राख्यौँ भने, हामीसँग समस्याहरू हुनेछन्”, उनले चेतावनी दिए ।

मङ्गलबार खामेनीले वार्ताहरू प्रारम्भिक चरणमा राम्रोसँग अघि बढेको भए पनि तिनीहरू अझै पनि निष्फल साबित हुनसक्ने चेतावनी दिए ।

प्रकाशित समय : १६:१४ बजे