राष्ट्रिय सभा सदस्य निर्वाचनका लागि आज मतदाता नामावली सार्वजनिक गरिने भएको छ ।

निर्वाचन आयोगको स्वीकृत कार्यतालिका अनुसार आज निर्वाचन अधिकृतको कार्यालयहरूमा मतदाता नामावली प्रकाशित हुनेछ । आयोगले सातवटै प्रदेशमा निर्वाचन अधिकृतको कार्यालय स्थापना गरिसकेको छ । प्रकाशित हुने नामावलीमाथि आजै दाबी–विरोध गर्न सकिने आयोगले जनाएको छ । दाबी-विरोधमाथि छानबिन गरी आयोगले पुस २२ गते मतदाताको अन्तिम नामावली सार्वजनिक गर्नेछ।

राष्ट्रियसभा निर्वाचनमा प्रदेशसभा सदस्य, गाउँपालिकाका अध्यक्ष तथा उपाध्यक्ष र नगरपालिकाका प्रमुख तथा उपप्रमुखले मतदान गर्न पाउँछन । प्रदेशसभा सदस्यको मतभार ५३ र स्थानीय तहका प्रमुख र उपप्रमुख तथा अध्यक्ष र उपाध्यक्षको मतभार १९ तोकिएको छ । उम्मेदवारको मनोनयन दर्ताका लागि आयोगले पुस २३ गते बिहान १० देखि दिउँसो ३ बजेसम्मको समय तोकेको छ ।

पुस २७ गते उम्मेदवारको अन्तिम नामावली प्रकाशन गरी २८ गते उम्मेदवारलाई निर्वाचन चिह्न प्रदान गर्ने आयोगको तालिका छ । माघ ११ गते बिहान ९ बजेदेखि ३ बजेसम्म मतदानको समय निर्धारण गरिएको छ । सबै प्रदेशमा २/२ गरी १४ वटा मतदान केन्द्र निर्धारण गरिएको आयोगले जनाएको छ । फागुन २० गते कार्यकाल सकिन लागेका निर्वाचित १९ जना सदस्यको स्थानमा निर्वाचन हुन लागेको छ ।

प्रकाशित समय : ०९:१९ बजे