मकवानपुरमा सम्पन्न पाँचौ संस्करणको ‘सहिद स्मृति स्थानीय तह अन्तर्राष्ट्रिय फुटबल प्रतियोगिता-२०७९’ मकवानपुर गोल्डकपको उपाधि मनाङ मर्स्याङ्दी क्लबले हात पारेको छ ।

उपाधिसँगै मनाङले नगद १५ लाख प्राप्त गरेको छ भने उपविजेता हिमालयन शेर्पा क्लबले नगद १० लाखसहित शिल्ड प्राप्त गरेको छ । यस्तै, प्रतियोगिताको सर्वोत्कृष्ट खेलाडी घोषित हुँदै मनाङका गोलरक्षक तथा कप्तान दीप कार्कीले बुलेट बाइक प्राप्त गरेका छन् ।

बुधबार सम्पन्न फाइनल खेलमा हिमालयन शेर्पा क्लबलाई १-० गोल अन्तरले पराजित गर्दै मनाङले उपाधि हात पारेको हो । निकै प्रतिस्पर्धात्मक रहेको खेलमा मनाङका लागि रोशन रानामगरले खेलको ७७औं मिनेटमा गरेको गोल निर्णायक बन्यो ।

प्रतियोगिताको उत्कृष्ट डिफेन्स हिमालयन शेर्पाका अमृत श्रेष्ठ, उत्कृष्ट फरवार्ड हिमालयन शेर्पाका विदेशी खेलाडी युमि, उत्कृष्ट मिडफिल्डर मनाङका कमल थापा र उत्कृष्ट गोलकिपर मनाङका दीप कार्की र उत्कृष्ट प्रशिक्षक मनाङका किरण श्रेष्ठ घोषित भए ।

उत्कृष्ट विधाका सबैले नगद २५-२५ हजार रुपैयाँ प्राप्त गरे। प्रतियोगितामा १२ टिमले प्रतिस्पर्धा गरेका थिए ।

प्रकाशित समय : २१:३७ बजे