नेशनल लाइफ इन्स्योरेन्स कम्पनी लिमिटेडले आज ३५औं वर्ष पूरा गरी ३६औं वर्षमा प्रवेश गरेको छ । कम्पनीले आफ्नो वार्षिक उत्सव विभिन्न कार्यक्रम आयोजना गरी मनाएको छ ।

कम्पनीको केन्द्रीय कार्यालय लाजिम्पाटमा विशेष रक्तदान कार्यक्रम सञ्चालन गरिएको छ । जसमा ५० भन्दा बढी कम्पनीका कर्मचारीको सहभागिता रहेको थियो । देशभरमा ३४ वटा बाल र बृद्ध आश्रमहरुमा खाना खुवाउने कार्यक्रम आयोजनासमेत गरिएको कम्पनीले जनाएको छ । यसैगरी कर्मचारीहरु माझ विभिन्न खेलकुद कार्यक्रम सम्पन्न गरिएको छ ।

संस्थापक समूह र सर्वसाधारण समूहको ५५:४५ को अनुपात रहेको यस कम्पनीले आर्थिक वर्ष २०७७/७८ को मुनाफाबाट कम्पनीले सेयरधनीहरुलाई १५ प्रतिशत बोनस सेयर र कर प्रयोजनको लागि नगद लाभांश पारित गरी साधारण सभा सम्पन्न गरिसकेको अवस्था छ । कम्पनीको जीवन बिमा कोषमा ५६ अर्बको हाराहारीमा रकम जम्मा भएको छ । आर्थिक वर्ष २०७७/७८ बोनस सेयर वितरणपछि कम्पनीको चुक्ता पूँजी ४ अर्ब ६४ करोड रुपैयाँ रहेको छ ।

आव २०७७/७८ को बिमांकीय मूल्यांकनपश्चात बीमितलाई न्यूनतम प्रतिहजार ६३ रुपैयाँदेखि अधिकतम प्रतिहजार ८५ रुपैयाँसम्म प्रदान गरेको जनाइएको छ । कम्पनीले चालु वर्षमा शाखा कार्यालय नेपालगंजमा आफ्नो भवन निर्माण गर्ने कार्य सुरु गरिसकेको छ । ११७ शाखा कार्यालय र ४६० कर्मचारी संख्या रहेको यस कम्पनीमा १ लाखभन्दा बढी अभिकर्ता कार्यरत छन् ।

कम्पनीले स्थापनाकालदेखि २०७९ साल पुस मसान्तसम्म कूल बिमाशुल्क आम्दानी ८५ अर्ब १ करोड आर्जन गरेको छ भने कूल ३८ लाख ६० हजार बिमालेख जारी गरेको छ र कूल २९ अरब ६० करोड बराबर बिमा दावी भुक्तानी गरेको छ ।

वार्षिकोत्सवको अवसरमा कम्पनीले व्यवसायिकता, प्रविधिमैत्री पारदर्शिता एवं विश्वसनीयतालाई थप अभ्यास गर्दै गुणस्तरीय बिमा सेवा प्रदान गर्ने प्रतिवद्धता जनाएको छ ।

प्रकाशित समय : १५:१८ बजे