जनमत पार्टीका अध्यक्ष डा. सीके राउतले आफ्नो दाइ डा. जयकान्त राउतलाई राष्ट्रिय योजना आयोगको सदस्य बनाएका छन् । अध्यक्ष राउतले पार्टीबाट उनको सिफारिस गरेपछि बुधवार प्रधानमन्त्री प्रचण्डले उनलाई राष्ट्रिय योजना आयोगको सदस्यमा नियुक्त गरेका छन् । नेपाल विज्ञान तथा प्रविधि प्रतिष्ठान (नास्ट)का वरिष्ठ कृषि वैज्ञानिकसमेत रहेका उनले २०७९ को आम चुनावताका पदबाट राजीनामा दिएका थिए ।

डा. जयकान्त राउत प्रतिनिधिसभाको चुनावमा सप्तरी–२ बाट निर्वाचन लडेका थिए । तर उनलाई जनता समाजवादी पार्टीका नवकिशोर साहले चुनाव हराएका थिए । नवलकिशोर साहले २३ हजार ६०४ मत ल्याएका थिए भने जयकान्त १९ हजार ९९६ मत ल्याएर पराजित भएका थिए । चुनावमा पराजित आफ्नै दाइलाई योजना आयोगमा सिफारिस गरेपछि पार्टीभित्र र बाहिर आलोचना सुरु भएको छ ।

यसअघि पनि अध्यक्ष सीके राउतले आफन्त बबिता राउतलाई समानुपातिक प्रणालीबाट मधेस प्रदेश सभामा ल्याएका थिए । उनी अहिले उपसभामुख छिन् । अध्यक्ष राउतको यो कदमको पनि चर्को आलोचना भएको थियो ।

जयकान्त राउतले सीके नेतृत्वको आन्दोलनमा भने हरहमेसा साथ दिँदै आएका थिए । उनले जागिरे भए पनि स्वतन्त्र मधेस गठबन्धनलाई सघाउँदै आएका थिए । तर मधेसलाई स्वतन्त्र बनाउनुपर्छ भन्ने पक्षमा भने जयकान्त थिएनन् । उनले भाइलाई संसदीय राजनीति गर्न सुझाव दिँदै आएका थिए । सीके राउत जेल पर्दा जयकान्तले नै कानुनी तथा प्रशासनिक कामहरू गरेर निकाल्न पहल गर्थे । स्वतन्त्र गठबन्धन छाडेर सीके राउत मूलधारमा आउनुमा जयकान्तको हात रहेको छ । जयकान्तले पछिल्लो समय सीके राउत थुनामा रहेका बेला उनलाई रिहा गर्न र ११ बुँदे सम्झौता गराउन तत्कालीन प्रधानमन्त्री केपी शर्मा ओलीसँग कुरा गरेर वातावरण निर्माण गर्न सफल भएका थिए ।

प्रकाशित समय : १२:०६ बजे