बुटवलमा केन्द्रीय कार्यालय रहेको साइन रेसुंगा बैंकले बुटवल उपमहानगरपालिका-११ को शहरी स्वस्थ्य केन्द्रका महिला स्वयंसेविका तथा कार्यालयका कर्मचारीलाई वित्तीय साक्षरता तालिम दिएको छ ।

बैंककी प्रमुख सञ्चालन अधिकृत नम्रता थापाले महिलाहरुलाई आर्थिक गतिविधि र बैंकिङ कारोबारमा सहभागी गराउँदै महिला सशक्तिकरणका लागि स्वास्थ्य स्वयम्सेविकाहरुलाई वित्तीय साक्षरता प्रदान गरेको बताइन् । सहभागी ३५ जना महिलालाई उक्त तालिम दिइएको हो ।

नेपालको कुल जनसंख्याको ५० प्रतिशत भन्दा बढी हिस्सा महिलाको भए पनि उनीहरुमा वित्तीय साक्षरता दर धेरै कम भएकाले बैंकले महिलालाई प्राथमिकता दिएको थापाले बताइन् । महिलाहरु उद्यम-व्यवसाय र उत्पादनसँग जोडिन पनि वित्तीय साक्षरता जरुरी हुने उनले स्पष्ट पारिन् । बैंकले वित्तीय साक्षरतालाई अभियानकै रुपमा सञ्चालन गरेको थापाले बताइन् ।

बैंंकका डिजिटल बैंकिङ अफिसर नारायण न्यौपानेले डिजिटल बैकिङ कारोबार गर्दा सेवाग्राहीले घर वा कार्यालयमै बसेर सुरक्षित र छिटोछरितो सेवा लिन सकिने र डिजिटल बैंकिङमा अपनाउनु पर्ने सतर्कता लगायतका विषयमा सहभागीलाई जानकारी गराएका थिए ।

प्रकाशित समय : १२:०१ बजे