चिनियाँ संसदका सभामुख एवं स्थायी समितिका अध्यक्ष ली चान्सु तीन दिने औपचारिक भ्रमणका लागि आज नेपाल आउँदैछन् ।

उनी नेतृत्वको टोली रुस, मंगाेलिया हुँदै दिउँसो नेपाल आउन लागेको हो । सभामुख अग्निप्रसाद सापकोटाको मैत्रीपूर्ण निमन्त्रणामा नेपाल आउन लागेका हुन् । भदौ २९ गतेसम्म नेपालमा रहने उनले भाेलि मंगलबार प्रधानमन्त्री शेरबहादुर देउवा र राष्ट्रिय सभा अध्यक्ष गणेशप्रसाद तिमिल्सिनासँग भेटवार्ता गर्नेछन् ।

यस्तै, लीले पर्सि राष्ट्रपति विद्यादेवी भण्डारीसँग शिष्टाचार भेट गर्ने कार्यक्रम छ । उनले एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल प्रचण्डसँग भेट गर्ने कार्यक्रम छ ।

चुनावको मिति नजिकिँदै गर्दा चीनबाट कम्युनिस्ट पार्टीका तेस्रो वरीयताका नेता नेपाल नेपाल भ्रमणमा आउन लागेका हुन् । उनको यो भ्रमणलाई नियमित र दुई देशको सम्बन्ध तथा सहकार्य बिस्तारका लागि रहेको बताइए पनि यसको भित्री उद्देश्य नेपालमा चीनको भू-राजनीतिक चासो रहेको परराष्ट्रविद्हरुले बताउँछन् ।

उनीभन्दा अघि गत असारमा चिनियाँ कम्युनिष्ट पार्टीका विदेश विभाग प्रमुख लिउ झियान्छाओ र गत चैतमा विदेशमन्त्री वाङ यी नेपाल आएका थिए । तर झान्सु भ्रमण प्रतिनिधिमण्डल र चीनले दिएको महत्त्वका हिसाबले २०७६ असोजमा भएको राष्ट्रपति सी जिनपिङ सरहको हुने जनाइएको छ ।

प्रकाशित समय : ०८:०६ बजे