नेपाली कांग्रेसका नेता डा. शेखर कोइरालाले आसन्न निर्वाचनका लागि पार्टीले गठबन्धन गर्ने भनिए पनि चार दलसँग कांग्रेसको केही नमिल्ने बताएका छन् । उनले गठबन्धन पवित्र वा अपवित्र भन्ने चुनावपछि मात्र थाहा हुने बताए ।

बिहीबार जनकपुरमा आयोजित एक कार्यक्रममा उनले कांग्रेसले गर्न लागेको गठबन्धन ‘विचित्र’ भएको धारणा राखे । सरकार बनाउन मात्र गठबन्धन गरिए त्यसले दीर्घकालमा सबैलाई समस्या पार्ने उनकाे भनाइ छ । ‘यो पवित्र हो कि अपवित्र गठबन्धन हो, आजै भन्न सक्ने अवस्था छैन । अहिले तपाईंहरूले सोध्नुभयो भने पनि म भन्न सक्दिनँ । तर, गठबन्धनमा रहेका चार दलको सिद्धान्त र विचार कांग्रेससँग मिल्दैन,’ उनले भने ।

उनले कांग्रेसले बहुमत ल्याउन कम्तीमा १०० सिटमा चुनाव लड्नुपर्ने बताए । त्योभन्दा सिट संख्या कम भए पार्टीभित्र विद्रोह सुरु हुने उनले चेतावनी दिए ।

प्रकाशित समय : १४:१२ बजे