नेशनल लाईफ इन्स्योरेन्स कम्पनी लिमिटेडले ३ दिने कर्मचारी सीप अभिवृद्धि कार्यशाला पोखरामा सम्पन्न भएको छ ।

कम्पनीमा कार्यरत प्रशासनिक कर्मचारीको दक्षता अभिवृद्धि गर्न ‘एक्सेल एन्ड इलेभेट २०७९/८०’ भन्ने नाराका साथ भएको उक्त सम्मेलनमा विभागीय प्रमुखसहित देशैभरिबाट प्रशासनिक कर्मचारीहरु गरी २०० जनाभन्दा बढीको सहभागिता थियो ।

कार्यक्रम कम्पनीका अध्यक्ष प्रेमाराज्य लक्ष्मी सिंहले दक्ष कर्मचारीहरुबाट नै उत्कृष्ट परिणाम प्राप्त गर्न सकिने भएकोले कम्पनीका कर्मचारीहरुको दक्षता अभिवृद्धिको लागि आवश्यक लगानी गर्दै जाने जानकारी गराइन् ।

कम्पनीका प्रमुख कार्यकारी अधिकृत सुरेशप्रसाद खत्रीले बिमा व्यवसाय प्रतिस्पर्धात्मक हुँदै गइरहेको वर्तमानस्थितिमा आफ्नो दक्षता, मेहनत र आपसी समन्वयबाट कम्पनीको व्यवसायिक लक्ष्य हासिल कार्यशाला आवश्यक रहेको बताए । उनले बिमा बजारमा कम्पनीलाई अग्रस्थानमा पुर्‍याउन मार्केटिङ कर्मचारीहरुको जत्तिकै भूमिका प्रशासनिक कर्मचारीको पनि हुने भएकोले सबैले आ–आफ्नो जिम्मेवारी वहन गर्न आग्रह समेत गरे ।

प्रमुख कार्यकारी अधिकृत खत्रीले बिमा समितिवाट कर्मचारी दक्षता अभिबृद्धि कार्यक्रम सञ्चालन गर्नुपर्ने निर्देशन प्राप्त भए अनुसार यो कार्यक्रम सञ्चालन गरिएको र आगामी वर्षहरुमा पनि यस्ता कार्यक्रम नियमित रुपमा सञ्चालन गरिने जानकारी गराए ।

कार्यक्रममा नियमनकारी निकाय बिमा समितिका निर्देशक सुशील देव सुवेदीले नेपालको बिमा क्षेत्रमा संस्थागत सुशासनको अवस्था र यस सम्बन्धमा नियामक निकायवाट भएका विस्तृत प्रयासहरुका सम्बन्धमा गहन जानकारी गराएका थिए ।

सम्मेलनमा सहभागि कर्मचारीहरुलाई चर्चित सञ्चारकर्मी एवं मिस नेपाल (२००५) सुगारिका केसीले व्यक्तित्व विकास सम्वन्धी प्रशिक्षण दिएकी थिइन् ।

प्रकाशित समय : ११:१७ बजे