मोरङको बेलबारीमा राप्रपाका मेयर उम्मेदवार खेमप्रसाद गौतम चढ्ने गाडीमा आगजनी गरिएको छ । मेयरमा उम्मेदवारी दिएका गौतमले पार्टीको झण्डा तथा मेयर र उपमेयरका उम्मेदवारको फोटोसहितको ब्यानर राखेर बा १२ च ९३८४ नम्बरको कार प्रयोग गर्दै आएका थिए ।

प्रहरीका अनुसार बेलबारी-२ स्थित घरमै पार्किङ गरेर राखेको अवस्थामा शुक्रबार बिहानपख करिब २ बजे आगजनी भएको हो । उनी आगामी स्थानीय तह निर्वाचनमा बेलबारी नगरपालिकामा राप्रपाबाट मेयरको उम्मेदवार बनेका छन् । 

प्रहरीले आगजनीमा संलग्न भएको आरोपमा एक जनालाई पक्राउ गरेको छ । सुन्दरहरैंचा नगरपालिका-१२ का अन्दाजी २८ वर्षीय सुवास पाण्डेलाई प्रहरीले पक्राउ गरेको हो । पक्राउ परेका पाण्डे कांग्रेसका स्थानीय कार्यकर्ता हुन् ।

सीसीटीभी क्यामेरा फुटेजका आधारमा उनलाई पक्राउ गरेको प्रहरीले जनाएको छ ।

प्रकाशित समय : १५:३१ बजे