कोभिड-१९ को नयाँ भेरिएन्ट ओमिक्रोनका कारण नआत्तिन बरु सर्तक भएर आवश्यक तयारी गर्न विश्व स्वास्थ्य संगठनले आग्रह गरेको छ । एउटा सम्मेलनलाई सम्बोधन गर्ने क्रममा डब्ल्यूएचओकी वरिष्ठ वैज्ञानिक सौम्या स्वामीनाथनले शुक्रवार अहिलेको अवस्था गत वर्षको भन्दा निकै फरक रहेको बताइकी छन् ।

प्राप्त विवरणहरूका अनुसार ओमिक्रोन झन्डै ४० वटा राष्ट्रमा पुगिसकेको छ । भारतमा ओमिक्रोनबाट संक्रमित कम्तीमा दुई व्यक्ति भेटिएका छन् । तर, नेपालमा अहिलेसम्म यो भेरिएन्ट आइपुगेको जानकारी छैन । कोरोनाभाइरसको व्यापक उत्परिवर्तित स्वरूप ओमिक्रोन बढी संक्रामक छ वा यसले खोपलाई छल्न सक्छ भन्ने विषय अझै स्पष्ट हुन सकेको छैन । कोभिडका कारण दक्षिण अफ्रिकाका वैज्ञानिकहरूले प्रस्तुत गरेका प्रारम्भिक विवरणअनुसार ओमिक्रोनले कोभिड-१९ विरुद्धको प्रतिरोधात्मक क्षमतालाई छल्न सक्ने सम्भावना  छ । तर, यो विश्लेषण शत प्रतिशत सही नहुन सक्ने बताइएको छ ।

रोएटर्स नेक्स्ट कन्फरेन्समा बोल्ने क्रममा डा. स्वामीनाथनले दक्षिण अफ्रिकाको तथ्यांकलाई उद्धृत गर्दै यो भेरिएन्ट 'अत्यन्तै संक्रामक' रहेको र यो विश्वभरि प्रभाव पार्न सक्ने 'स्ट्रेन' बन्न सक्ने सम्भावना रहेको बताइन् । तर, यस्तो पूर्वानुमान गर्न भने कठिन रहेको उनको भनाइ छ । उनका अनुसार अहिले विश्वमा फेला परेका कोभिड बिरामीमध्ये ९९ प्रतिशत डेल्टा भेरिअन्टबाट संक्रमित रहेका छन् । 'हामी कति चिन्तित हुनुपर्छ ? हामी तयार अनि सतर्क रहनुपर्छ, आत्तिने होइन किनभने हामी एक वर्षभन्दा पहिलेको समयसँग तुलना गर्दा निकै फरक अवस्थामा छौं,' उनले भनिन् ।

डब्ल्यूएचकोका आपतकालीन मामिला हेर्ने निर्देशक माइक रायनले विश्वमा झहिले कोभिड-१९ विरुद्ध 'निकै प्रभावकारी खोपहरू' उपलब्ध भएका र व्यापक रूपमा खोप वितरण गर्ने विषयमा ध्यान केन्द्रित गरिनुपर्ने बताए । कोभिडको नयाँ भेरिएन्टलाई ओमिक्रोन नाम दिइएको एक साता हुँदा कोभिडको यो स्वरूपले पार्न सक्ने खतराबारे बुझ्न विश्व संघर्षरत छ । तर, यो जटिल विषयबारे केही जानकारीहरू भने प्राप्त हुन थालेको छ ।  (बीबीसीबाट)

प्रकाशित समय : १९:४५ बजे