बुटवल । रुपन्देहीको सबैभन्दा जेठो विद्यालय बुटवल माविको भवनमा प्रदेशको एउटा मन्त्रालय राख्ने तयारी भएको छ । प्रदेश ५ को मुख्यमन्त्री बन्ने तयारीमा रहेका एमाले संसदीय दलका नेता शंकर पोखरेल, उपमहासचिव विष्णु पौडेलसहित प्रदेश सांसद, प्रदेशका प्रमुख सचिव, सरकारी अधिकारी सहितको टोलीले बुटवल माविको भवनको शुक्रबार अवलोकन गरेको छ ।
जिल्लाकै जेठो विद्यालय बुटवल मावि २००८ सालमा स्थापना भएको हो । बुटवलको मुख्य बजारभन्दा तिनाउ पारी रहेका ३ वटा विद्यालयलाई आपसमा गाभेर बुटवल माविको भवनमा मन्त्रालय राख्ने तयारी भएको हो । ३ विद्यालयलाई गाभेर बुटवल माविका विद्यार्थीलाई उजीर सिंह मावि र सरस्वती निमाविको भवनमा सार्ने छलफल भएको प्रदेशसभा सांसद भोजप्रसाद श्रेष्ठले बताए ।
सुनसान बनेको पुरानो बुटवल क्षेत्रलाई गुल्जार गराउन मन्त्रालय राख्ने तयारी गरिएको उनको भनाई छ । शुक्रबार बुटवल माविमा भएको अवलोकनका क्रममा ३ वटा विद्यालय व्यवस्थापन समितिको संयुक्त बैठक बसेर मर्ज प्रक्रिया अघि बढाउने र आगामी बैशाखबाट विद्यार्थीहरु अर्को विद्यालयमा सिफ्ट गर्ने बारे कुराकानी भएको छ । तर विद्यालयका प्रधानाध्यापक अकरमुल्लाह खाँले इतिहास बोकेको जेठो विद्यालय सार्ने निर्णय आफूलाई राम्रो नलागेको बताएका छन् ।
बुटवल माविका व्यवस्थापन समतिका अध्यक्ष विमलबहादुर शाक्यले विद्यालय मर्ज गरे पनि बुटवल हाई स्कुलको पहिचान मेटाउन नहुने भन्दै विद्यालयको नाम बुटवल मावि नै रहनुपर्ने उल्लेख गरे । बुटवलको पुरानो विद्यालयको शाख बचाउन र विद्यार्थीलाई आकर्षित गर्न यहाँ प्राविधिक शिक्षालय बनाउने, नयाँ तरिकाबाट विद्यालय व्यवस्थीत गर्ने लगायतका चर्चा पनि चल्ने गरेका छन् । तर प्रदेश पाँचको अस्थायी राजधानी बुटवल बनेपछि अहिले मन्त्रालय राख्नेबारे छलफल भएको हो ।

प्रकाशित समय : १२:३३ बजे