चितवन । चितवनमा रहेको भरतपुर विमानस्थल सँंघुरो बन्दै गएको छ । बढ्दो शहरीकरण, हवाईचाप वृद्धी र पर्याप्त जग्गाको अभावका कारण विमानस्थल सांघुरो बन्दै गएको हो । तत्कालीन हवाई सेवा विभाग अन्तरगतको भरतपुर हवाई कार्यालयको रुपमा २०१८ सालदेखी सेवा सुरु भएको विमानस्थलमा पछिल्लो समय हवाई चाप बढ्दै गएको छ ।
विमानस्थल सांघुरो बन्दै गएपछि क्षेत्र बढाउन प्रयास भएको थियो तर, क्षमता विस्तारका लागि प्रभावकारी पहल हुन सकेको छैन । विमानस्थल नजिकै रहेको सेनाको घोडा फारम रहेको क्षेत्र माग गरीएको भएपनि सेनाले अनुमती नदिएको नागरिक उड्यान कार्यालय भरतपुरका प्रमुख पवन गौतमले बताए । २०७२ सालमा पत्र पठाइएको जानकारी दिदै उनले सेनाले तत्कालै हुन नसक्ने जानकारी गराएको बताए ।
विमानस्थलको क्षेत्र बढाउनका लागि नजिकै रहेको सेनाको घोडा प्रजनन केन्द्र रहेको व्यारेक नै उपयुक्त मानिदै आइएको छ । तर,सेनाले मुख्य सहरको नजीक विमानस्थल हुनुभन्दा शहरवाट २५ किलोमिटर टाढा विमानस्थल राख्न सके राम्रो हुने तर्क राख्दै आफुले प्रयोग गर्दै आएको जमिन दिन नसक्ने बताएको गौतमले बताए ।
भरतपुर विमानस्थलमा दैनिक १४ वटा उडान हुन्छ । विमानस्थल वरपर मापदण्ड बिपरित बनाईएका अग्ला घर बनाइएकाछन् । जहाज अवतरण र पार्किङका लागी अग्ला घर सुरक्षा चुनौती बन्दै गएकाछन् । विमानस्थलमा चार वटा जहाजको क्षमता भएपनि धेरै जहाज पार्किङ हुदै आएको छ । सानो जहाजको लागी बनाईएको पार्किङमा मझौला जहाज राख्न समस्या भएको छ । एक दशक अघि दैनिक ४ वटा सम्म उडान हुने गरेपनि अहिले जहाजको संख्या पनि थपिएको छ ।
भरतपुर विमानस्थलबाट एकतर्फी दैनिक औसतमा ५ सय यात्रुले यात्रा गर्दै आएका छन । बुद्ध एयर,यति एयर र सिम्रिक एयरले नियमित उडान भर्दै आएका छन । यतिको जेट स्ट्रीम र बुद्ध एयरको बीचक्राफ्ट, एटिआर–४२ जस्ता आधुनिक बिमानले उडान भर्ने गरेको विमानस्थलका प्रवन्धक पवन गौतमले बताए ।
६२ विघाहा क्षेत्रफलमा रहेको उक्त विमानस्थल वरपर मापदण्ड विपरित अग्ला घर हुनु र क्षेत्र विस्तारका लागि प्रयाप्त जग्गा नभएकाले समस्या बढ्दै गएको गौतमले बताए । सानो जहाजलाई लक्षित गरेर बनाईएको विमानस्थलमा विस्तारै मझौला जहाज आउने क्रम बढेको बताउदै उनले विमानस्थललाई फराकिलो बनाउन पहल नगरे सुरक्षा खतरा देखिएको जानकारी दिए ।
अग्ला घरले बिमान अवतरण र उडान प्रभावित हुदै आएका छन् । अग्ला घरका कारण विमानले पुरा रन–वे प्रयोग गर्न नपाएको बताउदै गौतमले १ हजार २ सय मिटरको धावनमार्ग भएपनि दुई सय मिटर छोडेर अवतरण गरिदै आएको जानकारी दिए ।
साना जहाजलाई उडान र अवतरणमा ६ देखी ८ सय मिटर रन–वे भए पुग्छ । ठुलालाई १ हजार ४ सय मिटर जरुरी पर्छ । १ हजार २ सय मिटर रन–वे छ । हुस्सु लागेको बेला अग्ला घरले अवतरणमा समस्या हुने गरेको उनले बताए ।
मापदण्ड विपरित स्थायी रुपमा संरचना बनाइए पछि विमानस्थललाई समस्या भएको हो । विमानस्थल वरपर २ सय ५७ घर मापदण्ड विपरित बनेको तथ्यांक रहेको छ । समस्या समाधानको लागि प्रतिबेदन पेश गर्न गठित समितिले उडान सुरक्षा चुनौती थपिदै गएको प्रतिवेदन वुझाएको थियो । मापदण्ड विपरीतका घरहरुका कारण उडानमा गम्भिर असर परेको र भविस्यमा झन अप्ठेरो अवस्था आउन सक्ने संरचनाहरु हटाउनु पर्ने सझुाव दिईएको थियो ।
सिमारा,पोखरा र भैरहवाको वैकल्पिक बिमान स्थलमा भरतपुर विमानस्थल रहेको छ । चितवन पर्यटकिय हिसावले चितवन अगाडी बढिरहेकोले भरतपुर र मेघौलीमा रहेको विमानस्थललाई आन्तरीक र वाह्य पर्यटकको चाप वढाई आम्दानी बढाउन सकिने सरोकारवालाहरुले बताएकाछन् ।
चितवनमा भरतपुर देखि १६ किलोमिटर पश्चिममा मेघौली विमानस्थल पनि रहेको छ । मेघौली विमानस्थल २०१३ साल देखि संचालनमा आएको हो । मेघौली विमानस्थलमा चितवन राष्टिय निकुञ्जभित्र घुम्न आउने पर्यटक वोक्ने जाहाज अवतरण गरिदै आएको भएपनि पछिल्लो समय उडान हुन सकेको छैन ।
राजधानी काठमाडौं बाट पनि नजीक नेपालको केन्द्र भाग भौगोलिक रूपमा पनि अत्यान्त सुरक्षीत चितवन भित्र रहेकाले पनि यो विमानस्थललाई अन्तराष्ट्रिय विमानस्थल बनाउने चर्चा समेत चल्ने गरेको थियो ।

प्रकाशित समय : १३:४५ बजे