प्रधानमन्त्री केपी शर्मा ओलीले निजामती कर्मचारीलाई अहिलेको भन्दा दोब्बर काम गर्न निर्देशन दिएका छन् ।

पन्ध्रौं निजामती सेवा दिवसका अवसरमा मूल समारोह समितिले शुक्रबार आयोजना गरेको कार्यक्रममा प्रधानमन्त्री ओलीले मुलुकको समृद्धिका लागि अहिलेको भन्दा दोब्बर काम गरेर जनतालाई सेवा दिन निर्देशन दिएका हुन् । ‘दुई हप्तामा गर्ने काम एक सातामा गर्न सकिन्छ । कर्मचारी संख्या पनि पर्याप्त छ,’ सिंहदरबारमा आयोजित कार्यक्रममा ओलीले भने, ‘ढिलासुस्ती र अनियमितताको गुनासो सुन्नु नपरोस् । अब हामीले सुशासन दिनैपर्छ ।’

लोकतन्त्रका नाममा सरकारी तलब लिएर काम नगर्ने, उपयुक्त ढंगले खटाएका ठाउँमा नजाने र विरोध हड्ताल गर्ने संस्कार अन्त्य गर्न पनि प्रधानमन्त्री ओलीले आग्रह गरे । संघ, प्रदेश र स्थानीय सरकारको नयाँ प्रणाली लागू भएकाले अधिकारको व्यवस्थापन र कार्यान्वयनका सन्दर्भमा केही अन्योल र समस्या भए पनि सरकारले त्यसलाई क्रमशः मिलाउने उनको भनाइ छ ।

स्वच्छ, दक्ष, प्रभावकारी र नतिजामुखी प्रशासन र सेवाका लागि नयाँ निजामती कानुन ल्याइने उनले बताए । प्रधानमन्त्री ओलीले कर्मचारीको सुरक्षा, वृत्ति विकास, जायज मागको सुनुवाइका लागि माथिल्लोदेखि तल्लो तहसम्मका कर्मचारीका लागि उक्त कानुनले काम गर्ने उल्लेख गरे । उनले आधिकारिक ट्रेड युनियन कानुनी हैसियतको संस्था भएको र यसको उद्गम संस्था ट्रेड युनियन संगठन यथावत् रहने स्पष्ट पारे ।

कार्यक्रममा सघीय मामिला तथा सामान्य प्रशासनमन्त्री लालबाबु पण्डितले संघीय निजामती सेवा ऐन प्रतिनिधिसभामा पेस गर्न मन्त्रिपरिषदमा विचाराधीन रहेको जानकारी दिए । तीन तहका सरकारबीचको व्यवस्थापनका क्रममा जस्तोसुकै कठिन काम पनि हाँसीखुसी गर्न राष्ट्रसेवकलाई उनले आग्रह गरे ।