निर्वाचन आयोगले प्रक्रिया नै नपुर्‍याइ ४० वटा गाडी विभिन्न निकायलाई बाँडेको पाइएको छ । स्थानीय तह, संघीय तथा प्रदेश संसदको निर्वाचनका क्रममा भारतले उपलब्ध गराएकामध्ये ३९ वटा र आयोग आफैले किनेकामध्ये एउटा गरी ४० वटा सवारीसाधन विभिन्न निकायलाई बाँडेको हो ।
निर्वाचनका लागि भनेर भारतले ८६ वटा आधुनिक सवारी साधन निर्वाचन आयोगलाई अनुदानमा उपलब्ध गराएको थियो ।
निर्वाचन आयोगले कुन कुन निकायलाई यसरी सवारी साधन बाँड्यो भन्ने विषयमा महालेखा परीक्षकले केही खुलाएको छैन । महालेखा परीक्षको ५६ औं प्रतिवेदनअनुसार गत आर्थिक वर्षमा आयोगले प्रतिगोटा .२ करोड ३२ लाखका दरले एक निजी कम्पनीमार्फत २९८२ सीसीको
५ वटा प्राडो जीप ११ करोड ६० लाख रुपैयाँमा किनेको छ ।

सरकारी गाडीको रेकर्ड नै छैन

यसैबीच सरकारी गाडीबारेको रेकर्ड नै नभएको पाइएको छ । सरकारी निकायहरूले आर्थिक वर्ष २०७४÷७५ मा मात्र रु.६ अर्ब ६१ करोड ४५ लाख ३७ हजारका ६ हजार ९०९ मोटरसाइकल तथा १ हजार २४ कार, जिप, पिकअपलगायतका सवारीसाधन खरिद गरेका छन् ।
यातायात व्यवस्था विभागले उपलब्ध गराएको तथ्यांकअनुसार सरकारी नम्बरमा दुई पांग्रे सवारीसाधन ३५ हजार २८० र चार पांग्रे सवारीसाधन २१ हजार ९५ वटा दर्ता भएको महालेखा परीक्षकको प्रतिवेदनमा उल्लेख छ । यद्यपि, महालेखाले लेखापरीक्षणका लागि ६० निकायबाट विवरण माग गर्दा नेपाल प्रहरी र सशस्त्र प्रहरी गरी २ निकायमा मात्र एकीकृत अभिलेख रहेको र अन्य निकायले आफ्नो कार्यालयको मात्र अभिलेख राखेको जवाफ दिएका छन् ।
महालेखाका आनुसार सिंहदरबारस्थित २२ मन्त्रालयमा १ हजार ११५ मोटरसाइकल र ८ सय सवारीसाधन रहेकोमा ९०९ मोटरसाइकल र ६२२ सवारीसाधन मात्र चालु हालतमा छन् । ती मन्त्रालयहरूमा ९३ मोटरसाइकल र ८४ सवारीसाधन मर्मत सम्भार गरी सञ्चालन गर्न सकिनेमा मर्मत सम्भार नै नगरी राखिएका छन् । बेवारिसे अवस्थामा रहेका २१ मोटरसाइकल र २६ सवारीसाधनको खरिद, भण्डारण र प्रयोगसम्बन्धी कागजात र अभिलेख व्यवस्थित नभएको महालेखाले जनाएको छ ।
मर्मत हुन नसक्ने भई लिलाम गर्नुपर्ने अवस्थामा ९२ मोटरसाइकल र ६८ सवारीसाधनमध्ये प्रधानमन्त्रीको निर्देशनपश्चात ११ मोटरसाइकल (१.९६ प्रतिशत) र ९ सवारीसाधन (१३.२४ प्रतिशत) मात्र लिलाम गरेको महालेखाको प्रतिवेदमा उल्लेख छ । लिलाम गर्न बाँकीमध्ये परराष्ट्र मन्त्रालयमा १४ सवारीसाधन र संघीय मामिला तथा सामान्य प्रशासन मन्त्रालयमा २१ मोटरसाइकल छन् ।
प्रधानमन्त्री तथा मन्त्रिपरिषद्को कार्यालयबाट प्राप्त तथ्यांकअनुसार ७१ मोटरसाइकल र २०६ सवारीसाधन विभिन्न प्रदेश कार्यालय तथा स्थानीय तहमा हस्तान्तरण गरिएको छ ।

संस्थान र आयोजनाका गाडी दुरूपयोग

नेपाल विद्युत प्राधिकरणको चमेलिया जलविद्युत आयोजनाले आयोजनाको प्रयोजनका लागि खरिद गरेका ८ थान प्राडो सवारीसाधन ३ पूर्व प्रधानमन्त्री, १ पूर्व गृहमन्त्री, १ प्रधानमन्त्रीको सचिवालय र ३ गृह मन्त्रालयले विगतदेखि प्रयोग गर्दै आएकोमा नेपाल सरकारको २०६६ चैत १७ र विभिन्न मितिको निर्णयबाट नेपाल विद्युत प्राधिकरणलाई रु.६ करोड १७ लाख ८ हजार भुक्तानी गरी नेपाल सरकारको नाममा लैजाने निर्णय गरेको भए तापनि ९ वर्ष बितिसक्दासमेत नेपाल सरकारको नाममा आइनसकेको महालेखाको प्रतिवेदनमा उल्लेख छ ।

ऊर्जा जलस्रोत तथा सिँचाइ मन्त्रालयले नेपाल विद्युत प्राधिकरणबाट बा. १३ च ५७९३ लगायतका ४ सवारीसाधन प्रयोग गरेको प्रतिवेदनमा छ । महालेखाका अनुसार नेपाल दूरसञ्चार कम्पनी लिमिटेडका बा.६ च ८८३६ लगायतका २ जिप सञ्चार तथा सूचना प्रविधि मन्त्रालयमा र एक जिप प्रधानमन्त्री तथा मन्त्रिपरिषद्को कार्यालयले प्रयोग गरेको देखिएको छ । नेपाल आयल निगम लिमिटेडका बा.१.ञ २१३७ लगायत ४ जिप तथा कार समेत उद्योग, वाणिज्य तथा आपूर्ति मन्त्रालयले प्रयोग गरेको छ ।
मेलम्ची खानेपानी विकास समितिले आयोजनाको कामको लागि खरिद गरेका सवारीसाधनहरुमध्ये ९ सवारीसाधन अन्य निकायलाई उपलब्ध गराएको छ । ती सवारीसाधन प्रधानमन्त्री तथा मन्त्रिपरिषद्को कार्यालय, शहरी विकास र खानेपानी मन्त्रालय, क्षेत्रीय प्रशासन कार्यालय हेटौँडा, काठमाडौँ उपत्यका विकास पौधिकरण र काठमाडौँ उपत्यका खानेपानी व्यवस्थापन बोर्डले एकदेखि तीन वटासम्म प्रयोग गरेको देखिन्छ ।
ती निकायमा प्रयोग भएका सवारीसाधनमध्ये टोयोटा प्राडो जिप ८ र कोरोला कार १ रहेको छ ।

बुलेटप्रुफ कारको बेहाल
पूर्वराजपरिवारका सदस्यले प्रयोग गरेका ११ भी.भी.आई.पी. बुलेट प्रुफ कारसहित २६ सवारीसाधन रहेका छन् । यीमध्य एउटा भी.भी.आई.पी. बुलेटप्रुफ कार ०७५ असोज ७ गते उपराष्ट्रपतिको कार्यालयमा हस्तान्तरण गरेको महालेखाले जनाएको छ । अन्य १० कार सामान्य सर्भिसिङ, ब्याट्री परिवर्तन, इन्जिन मर्मत गरी सञ्चालन हुन सक्ने भए पनि चालू अवस्थामा नरहेको ४ कार ०७५असोज ७ गते नेपाली सेनालाई हस्तान्तरण गरेको र ६ कार नारायणहिटी दरबार संग्रहालयमा नै प्रयोगविहीन अवस्थामा छन् ।

प्रकाशित समय : १८:४२ बजे