काठमाडौं । नेपालको अग्रणी भुक्तानी प्रदायक कम्पनी इसेवाले डिजिटल वालेटको क्षेत्रमा पहिलोपटक ‘बाइ नाउ, पे लेटर’ (बीएनपीएल) सेवा सार्वजनिक गरेको छ । यो सेवामार्फत ग्राहकले इसेवा प्लेटफर्मबाट विद्युतीय स्कुटर खरिद गर्न सक्नेछन् ।

यस सम्बन्धमा असोज ८ गते इसेवाको केन्द्रीय कार्यालयमा आयोजित कार्यक्रममा इसेवा, रिलायन्स फाइनान्स लिमिटेड र विद्युतीय स्कुटर बिक्रेता कम्पनी परिमिता इन्भेष्टमेन्ट प्रालिबीच त्रिपक्षीय साझेदारीपत्रमा हस्ताक्षर भएको हो ।

साझेदारीपत्रमा इसेवाका निवर्तमान प्रमुख कार्यकारी अधिकृत जगदीश खड्का, रिलायन्स फाइनान्सका नायब प्रमुख कार्यकारी अधिकृत रामहरि आचार्य र परिमिता इन्भेष्टमेन्ट प्रालिका मनन तुलाधरले हस्ताक्षर गरेका छन् ।

साझेदारीअनुसार ग्राहकले परिमिताका विद्युतीय स्कुटर खरिदका लागि इसेवा प्लेटफर्ममार्फत बीएनपीएल सुविधा लिन सक्नेछन् । रिलायन्स फाइनान्सले वित्तीय साझेदारका रूपमा कर्जा उपलब्ध गराउनेछ भने परिमिताले विद्युतीय स्कुटर उपलब्ध गराउनेछ ।

९.९९ प्रतिशत ब्याजमा दुई लाख रुपैयाँसम्म कर्जा

बीएनपीएल सेवाअन्तर्गत ग्राहकले विद्युतीय स्कुटर खरिदका लागि डिजिटल माध्यमबाट वित्तीय सुविधा लिन सक्नेछन् । ग्राहकले इसेवा एपबाटै कर्जा प्रक्रियासहित आवश्यक प्रक्रिया पूरा गरी यो सुविधा लिन सक्नेछन् ।

रिलायन्स फाइनान्सले विद्युतीय स्कुटर खरिदका लागि ९.९९ प्रतिशत ब्याजदरमा अधिकतम दुई लाख रुपैयाँसम्मको डिजिटल कर्जा उपलब्ध गराउनेछ । ग्राहकले उक्त कर्जा अधिकतम ३६ महिनासम्मको किस्ताबन्दीमा चुक्ता गर्न सक्नेछन् ।

यसले ग्राहकलाई एकैपटक ठूलो रकम भुक्तानी गर्नुपर्ने अवस्थालाई सहज बनाउँदै आवश्यकताअनुसार किस्तामा भुक्तानी गर्ने विकल्प उपलब्ध गराउने कम्पनीको भनाइ छ ।

डिजिटल वित्तीय सेवा र विद्युतीय यातायातमा जोड

इसेवाले डिजिटल प्रविधिमार्फत वित्तीय सेवाको पहुँच सहज बनाउन ग्राहकका दैनिक आवश्यकतासँग जोडिएका विभिन्न नवीन समाधान विकास गर्दै आएको जनाएको छ । बीएनपीएल सेवा पनि डिजिटल माध्यमबाट वित्तीय सेवा उपलब्ध गराउने प्रयासकै निरन्तरता भएको कम्पनीको भनाइ छ ।

विद्युतीय स्कुटर खरिदलाई सहज बनाउने उक्त साझेदारीले वातावरणमैत्री यातायातको प्रयोगलाई समेत प्रोत्साहन गर्ने अपेक्षा गरिएको छ । विद्युतीय सवारीसाधनको प्रयोगमार्फत प्रदूषण न्यूनीकरण, दिगो यातायात प्रवर्द्धन तथा डिजिटल अर्थतन्त्र निर्माणमा योगदान पुग्ने विश्वास कम्पनीले व्यक्त गरेको छ ।

इसेवा, रिलायन्स फाइनान्स र परिमिता इन्भेष्टमेन्टबीचको त्रिपक्षीय साझेदारीले डिजिटल भुक्तानी, वित्तीय सेवा तथा विद्युतीय यातायात क्षेत्रबीचको सहकार्य विस्तार गर्दै ग्राहकमैत्री नयाँ सेवाको विकासमा टेवा पुग्ने अपेक्षा गरिएको छ ।

इसेवाले ग्राहकको आवश्यकता र बदलिँदो जीवनशैलीलाई ध्यानमा राख्दै आगामी दिनमा पनि नवीन डिजिटल समाधान विस्तार गर्दै जाने जनाएको छ ।

प्रकाशित समय : २०:१२ बजे