प्रतिनिधिसभालाई दलगत अनिर्णयको बन्दी बनाइएको भन्दै नेपाली कांग्रेसले आपत्ति जनाएको छ । लगातार तेस्रोपटक प्रतिनिधिसभा बैठक स्थगित गरिएको विषयलाई कांग्रेसले ‘दुखद विषय’ भनेको छ ।

कांग्रेस प्रवक्ता विश्वप्रकाश शर्माद्वारा आइतबार जारी विज्ञप्तिमा ‘नेपाली कांग्रेसले यसलाई सरकार र सत्तारूढ नेकपाको संसदप्रति गरेको गैह्रजिम्मेवार व्यवहारका रूपमा लिएको छ’ भनिएको छ ।

‘संसदीय प्रणालीमा सभामुखको विशेष नेतृत्वदायी भूमिका, गरिमा र महत्व हुन्छ, तर ३ महिनादेखि रिक्त पदमा नयाँ सभामुख चयन गर्न प्रतिनिधिसभामा प्रक्रिया अघि नबढाइनु र सत्तारूढ दलभित्रको विवादको छायाँमा प्रतिनिधिसभालाई लाचार बनाउन खोज्नु आपत्तिजनक र लज्जास्पद छ,’ कांग्रेसले भनेको छ ।

स्वयं सत्तापक्षका कारण महिना दिनदेखि सदन अवरुद्ध रहेको स्थितिलाई गम्भीरतापुर्वक लिंदै प्रतिनिधिसभालाई दलगत अनिर्णयको बन्दी नबनाउन नेपाली कांग्रेसले सरकारलाई चेतावनी दिएको छ । कांग्रेसले भनेको छ, ‘तत्काल निकासको मार्ग प्रशस्त गर्न सरकार र सत्तारूढ नेकपालाई सचेत गराउँदछौँ ।’

प्रकाशित समय : १९:५६ बजे