गण्डकी । कृषि प्रतिको अनिच्छासँगै युवा पलायनका कारण खेतबारीहरू बाँझिदै गरेका वास्तविकतामा तनहुँको भानु नगरपालिका वडा नं ९ चितीखोलास्थित कडरिया एकिकृत कृषि फर्म भने कृषि जान्न र बुझ्न चाहने जो कोहीका लागि राम्रै पाठशाला बनेको छ ।

एकै स्थानमा कृषिका विविधतासँगै सम्भावनालाई प्रत्यक्ष अवलोकन गर्न पाइने यस फर्ममा कुल २७ रोपनी क्षेत्रफलमा बहुप्रजातिका कृषिजन्य उत्पादन गरिदै आइएको छ ।

पहिला सामान्य रुपमा थालिएको उनको कृषिकर्म यतिखेर कडरिया एकिकृत कृषि फर्मका रुपमा अघि बढीरहेको छ । उनको फर्ममा पशुपालन, कुखुरा पालन, तरकारी तथा फलफूल खेतीहरू एकै साथ गरिदै आइएको छ ।

कडरियामा कृषिमा केही गर्नुुपर्छ भन्ने भावना भने विद्यार्थी हुँदादेखि नै सुरु भएको हो । २०३५ सालमा स्थानीय कालिका माध्यमिक विद्यालयमा पढ्ने बेलामा बागबानी विषयको प्रयोगात्मक सिकाई घरमा नै गर्ने गरिन्थ्यो । त्यसै समयदेखि नै कृषिका विभिन्न प्रयोग गर्दै आएका उनले अहिले भने एकिकृत कृषि फर्म मार्फत अरुका लागि पनि प्रेरणको स्रोत बनीरहेका छन ।

सुरुमा चार सय बोट सुन्तला र एक हजार छ सय बोट कफिबाट सुरु गरिएको व्यवसायिक कृषिले उनलाई अन्ततः सफल कृषि व्यवसायी बनाएको हो ।

सुरुमा सुन्तला राम्रै उत्पादन भएपनि २०५२/०५३ बाट सुन्तलामा रोग लाग्न थालेपछि त्यसको विकल्पमा केरा, अदुवा खेती आदि गरेको उनले अनुभव सुनाए ।आँफूले २०५३/२०५४ सालतिर एक हजार ७०० धार्नीसम्म अदुवा उत्पादन गरेको अनुभव सुनाउँदै उनले त्यस क्रममा हलेदो खेती समेत गरेको बताए।

त्यस्तै २०५४ र २०५५ सालतिर तीन रोपनी क्षेत्रफलमा जाली लगाएर खुल्ला रुपमा लोकल कुखुरा पालन गरेका कडरियाले झण्डै आठ सयसम्म कुखुरा पाले । तर ती ती कुखुराबाट त्यति फाइदा हुन सकेन । त्यस पछि एक हजार लेस कुखुरा पालेका उनले कोरोना महामारी पछि ती पनि हटाए । त्यस यता झण्डै दुई हजारको संख्यासम्म बोइलर कुखुरा पालन गरिरहेको उनले अनुभव सुनाए ।

प्रकाशित समय : १५:५१ बजे