रसियाली परराष्ट्रमन्त्री सेर्गेई लावरोभले बताए अनुसार, संयुक्त राज्य अमेरिका विश्व ऊर्जा बजारमा आफ्नो प्रभुत्व स्थापित गर्न रणनीति बनाइरहेको छ । उनले एक अन्तरवार्तामा भने, “संयुक्त राज्य अमेरिका केवल आफ्नो हितको ख्याल गर्छ । उनीहरू आफ्नो समृद्धि जोगाउन कुनै पनि उपाय अपनाउन तयार छन् – चाहे त्यसमा विदेशी देशमा कू गर्न, नेताहरूको अपहरण गर्न वा हत्या गर्नुपरे पनि । यी सबै कार्य तेल र ऊर्जा स्रोतसँग प्रत्यक्ष सम्बन्धित छन् ।”

मन्त्री लावरोभले अमेरिकाले सधैं आफ्नो राष्ट्रिय हितलाई अन्तर्राष्ट्रिय नियम र सम्झौताभन्दा माथि राख्ने नीति अपनाउँदै आएको बताएका छन । उनले भने,“संयुक्त राज्य अमेरिका रूसलाई युरोपेली ऊर्जा बजारबाट सीमित बनाउन सधैं स्वागत गर्दै आएको छ र अझै पनि यसलाई निरन्तरता दिइरहेको छ ।”

उनले थप स्पष्ट पार्दै रूससँग सहकार्य गर्न चाहने अमेरिकाले पहिलो चरणमा रूसका हितको सम्मान गर्नैपर्ने बताए । लावरोभले जोड दिए, “दुई देशबीच समान र पारस्परिक हितको आधारमा मात्र दीर्घकालीन सहकार्य सम्भव छ ।”

यस अन्तरवार्तामा लावरोभले अमेरिका र अन्य पश्चिमेली देशहरूको ऊर्जा नीतिको आलोचना गर्दै वर्तमान समयमा विश्व ऊर्जा बजारमा शक्ति सन्तुलनको समस्या रहेको बताए । उनले प्राकृतिक स्रोत भएका देशहरूको स्वतन्त्रता र स्वामित्वलाई चुनौती दिने प्रयासले अन्तर्राष्ट्रिय तनाव बढाउने सम्भावना रहेको बताए ।

रसियाली परराष्ट्र मन्त्रालयको अनुसार, लावरोभले यस विषयमा अन्तर्राष्ट्रिय समुदायलाई पनि सचेत गराउन चाहेका छन्, ताकि ऊर्जा स्रोतको उपयोग र बजार व्यवस्थापनमा न्यायपूर्ण दृष्टिकोण अपनाइयोस् ।

प्रकाशित समय : १३:५० बजे