काठमाडौँ । स्वस्थानी देवी एवं माधवनारायण मेलाको अन्तिम दिन आज लाखौँ भक्तजन साँखुस्थित शालीनदी पुगेका छन् । साँखुस्थित शालीनदीमा लाग्ने माधवनारायण मेलाको अन्तिम दिन परेकाले एकै दिन हजारौँ भक्तजन आएका शालीनदी सुधार तथा व्यवस्थापन समितिले जनाएको छ ।

एकै दिन हजारौँ भक्तजन आएपछि व्यवस्थापनका लागि मुस्किल परेको समितिका अध्यक्ष विकासमान सिंहले राससलाई जानकारी दिनुभयो । शुक्रबार र शनिबार पनि शालीनदीमा हजारौँ  भक्तजन पुगेका थिए । भक्तजन धेरै भएपछि आज थलीदेखि सवारी चाप बढेको समितिले जनाएको छ ।

पौष शुक्ल पूर्णिमादेखि माघ शुक्ल पूर्णिमासम्म शालीनदी मेला लाग्छ । यस अवधिमा यहाँ आएर स्नान गरेर माधवनारायण र स्वस्थानी देवीको पूजाआराधना गरेमा पुण्य पाइने धार्मिक विश्वास छ । यही विश्वासका साथ बर्सेनि यहाँ हजारौँ भक्तजन आउने गरेका छन् ।

एक महिना अघिदेखि सुरु भएको माधवनारायण मेला आज सकिने समितिले जनाएको छ । यस वर्ष १६२ महिला र १५ पुरुषले माधवनारायणको कठोर व्रत गरिरहेका छन् । आज राति माधवनारायणका वर्तालुले अश्वमेध यज्ञ गरी व्रत समापन गर्ने समितिले जनाएको छ ।

प्रकाशित समय : १९:३१ बजे