भारतमा घरेलु क्रिकेट प्रतियोगिताका क्रममा एक खेलाडीको मैदानमै मृत्यु भएको छ । भारतको चर्चित घरेलु प्रतियोगिता रणजी ट्रफी खेलिसकेका मिजोरमका खेलाडी के. लालरेमरुआटाको खेलका क्रममा मैदानमै निधन भएको हो ।

भारतीय सञ्चारमाध्यमले जनाएअनुसार बिहीबार मिजोरममा एक स्थानीय प्रतियोगिताका क्रममा उनको हृदयघातका कारण निधन भएको हो । ३८ वर्षीय के. लालरेमरुआटा दोस्रो श्रेणीको प्रतियोगितामा वेंगनुआई रेडर्स क्रिकेट क्लबबाट खेलिरहेका थिए ।

समाचारमा जनाइएअनुसार ब्याटिङ गरेर पेभेलियन फर्किनेक्रममा उनलाई हृदयघात भएको थियो । अचानक मैदानमा ढलेका उनको तत्कालै निधन भएको थियो । चिकित्सकहरूले उनको मृत्यु हृदयघातका कारण भएको जनाएका छन् ।

के. लालरेमरुआटा मिजोरम क्रिकेटमा चर्चित नाम थियो । उनले दुईपटक रणजी ट्रफीमा मिजोरमको प्रतिनिधित्व गरेका थिए । यसका अतिरिक्त, उनले मिजोरमको टोलीबाट सैयद मुश्ताक अली ट्रफीमा पनि सात खेल खेलेका थिए ।

घरेलु क्रिकेटका अतिरिक्त उनले स्थानीय स्तरको विभिन्न प्रतियोगितामा पनि सहभागिता जनाउँदै आएका थिए । मिजोरम क्रिकेट संघले उनको निधनबाट अपूरणीय क्षति भएको जनाएको छ । ‘हामी के. लालरेमरुआटाको परिवारप्रति गहिरो समवेदना व्यक्त गर्दछौं । ईश्वरसँग के. लालरेमरुआटाको आत्माको चिर शान्तिको कामना पनि गर्दछौं,’ संघद्वारा जारी विज्ञप्तिमा भनिएको छ ।

प्रकाशित समय : १४:२५ बजे