पश्चिम इन्डोनेसियाको समुद्री क्षेत्रमा डुंगा पल्टिएपछि हराइरहेका ११ जना सबै व्यक्तिको सफलतापूर्वक उद्धार गरिएको इन्डोनेसियाली अधिकारीले मंगलबार पुष्टि गरेका छन् । केही व्यक्ति डुंगाका टुक्रा समातेर बाँच्न सफल भएको जनाइएको छ ।

सो डुंगा सोमबार बिहान करिब ११ बजे पश्चिम सुमात्राको तटस्थित मेन्टावाई टापु समूह नजिकै दुर्घटनाग्रस्त भएको थियो । डुंगामा १८ जना यात्रु सवार थिए ।

मेन्टावाई खोज तथा उद्धार एजेन्सीका प्रमुख रुडीले एक विज्ञप्तिमा भने, “हामीले १८ वटै पीडितको सफलतापूर्वक उद्धार गरेका छौँ ।”

लाइफ ज्याकेट र टुक्रा समाएर बाँचिए

उद्धार गरिएका केही यात्रुहरूले जीवनरक्षक ज्याकेट लगाएका थिए भने केहीले पल्टिएको डुंगाका टुक्रा समाएर पानीमा टिकिरहेका थिए ।

डुंगा पल्टिनुअघि ठूलो छालले डुंगालाई एकाएक ठक्कर दिएको विवरण पनि आएको छ । “डुंगाका अपरेटरले दिएको विवरणअनुसार, छालले डुंगालाई छेउबाट ठक्कर दियो र त्यसपछि डुंगा पल्टियो,” रुडीले भने ।

उद्धार गरिएका मध्ये एकजना व्यक्तिलाई स्थानीय क्लिनिकमा उपचार भइरहेको भए पनि उनको स्वास्थ्य अवस्था सामान्य रहेको बताइएको छ ।

बारम्बार हुने समुद्री दुर्घटना

करीब १७ हजार टापु रहेको दक्षिणपूर्वी एसियाली द्वीप राष्ट्र इन्डोनेसियामा जल यातायातका दुर्घटना प्रायः हुने गर्छन् । यसका प्रमुख कारणमा कमजोर सुरक्षाको मापदण्ड र प्रतिकूल मौसम अवस्था पर्छन् ।

यसै महिना, जुलाई ३ मा बाली नजिकै एक डुंगा दुर्घटनामा कम्तीमा १८ जनाको मृत्यु भएको थियो । मार्च महिनामा पनि बाली नजिकै १६ यात्रु सवार डुंगा दुर्घटनामा परेका थिए, जसमा एक अष्ट्रेलियाली महिलाको मृत्यु र कम्तीमा एक जनाको घाइते भएको थियो ।

सन् २०१८ मा सुमात्रा टापुस्थित विश्वकै गहिरो तालमध्ये एकमा डुंगा डुब्दा १५० भन्दा बढी व्यक्तिको ज्यान गएको थियो ।

प्रकाशित समय : १९:४५ बजे