पोलिस प्रधानमन्त्री डोनाल्ड टस्कले बिहीबार ब्रसेल्समा एक महत्त्वपूर्ण नेतृत्व शिखर सम्मेलनअघि बोल्दै युरोपेली साझेदारहरूलाई पेरिसको आणविक छाता विस्तार गर्ने सम्भावित प्रस्तावमा फ्रान्सको स्थिति ‘अत्यन्त आशाजनक’ रहेको बताएको छ ।

युरोपेली सङ्घ (इयु) का २७ राष्ट्रका नेताहरू युक्रेनी राष्ट्रपति भोलोदिमर जेलेन्स्कीसँग वार्ताका लागि भेला भएका छन् र अमेरिकी राष्ट्रपति डोनाल्ड ट्रम्पले किएभलाई सैन्य सहायता रोकेसँगै युद्धग्रस्त देशलाई समर्थन सुदृढ गर्ने लक्ष्य राखेका छन् ।

बुधबार एक भाषणमा राष्ट्रपति इमानुएल म्याक्रोनले फ्रान्सको आणविक सुरक्षा अन्य युरोपेली राष्ट्रहरूमा विस्तार गर्नेबारे छलफल गर्ने घोषणा गरेको थियो ।

“फ्रान्सको यो तत्परता, यो अत्यन्त आशाजनक कुरा हो”, पोलिस प्रधानमन्त्री डोनाल्ड टस्कले ब्रसेल्समा पत्रकारहरूलाई भने “हामीले यो प्रस्तावलाई गम्भीरतापूर्वक लिनुपर्छ ।”

उनेले रुसविरुद्ध युरोपको रक्षा बलियो बनाउन पुनः आह्वान गरे ।

“युरोपमा हाम्रा सबै क्षमताहरूको समन्वय गर्नु र वास्तवमा एउटा राम्रो समन्वित सैन्य शक्ति निर्माण गर्नु हाम्रो प्राथमिकताहरू मध्ये एक हुनुपर्छ । यसले हामीलाई रुसप्रति स्पष्ट फाइदा दिन सक्छ”, उनले भने, “युरोपले यो चुनौती, यो हतियारको दौड लिनुपर्छ र यसमा विजयी हुनुपर्छ ।”

नाटो सदस्य र आफ्नो छिमेकी युक्रेनको प्रमुख सहयोगी पोल्यान्डले पनि रूसी एक्सक्लेभ कालिनिनग्राद र मस्कोको सहयोगी बेलारुससँग सीमा साझा गर्दछ ।

सम्भावित जर्मन चान्सलर फ्रेडरिक मेर्जले सुरक्षाको त्यो छाता विस्तार गर्न ‘ऐतिहासिक’ आह्वान गरेपछि म्याक्रोनले फ्रान्सको आणविक प्रतिरोधलाई अन्य युरोपेली राष्ट्रहरूमा विस्तार गर्ने बहस खोल्ने बताए ।

जर्मनीको चुनाव जितेको दक्षिणपन्थी पार्टीले गत महिना रुसबाहेक युरोपको एक मात्र आणविक शक्ति फ्रान्स र बेलायतसँग ‘आणविक साझेदारी’ मा छलफल गर्न चाहेको बताएको थियो ।

अप्रिलमा पोल्यान्डका राष्ट्रपति आन्द्रेज डुडाले आफ्नो देश नाटोको आणविक हतियारको आयोजना गर्न तयार रहेको बताएको थियो ।

जवाफमा मस्कोले ‘आफ्नो सुरक्षा सुनिश्चित गर्न’ कदम चाल्ने चेतावनी दिएको थियो ।

प्रकाशित समय : १९:२७ बजे