सत्तारुढ नेपाली कांग्रेसका सांसद उदयसमशेर जबराले नेपाल नागरिक उड्डयन प्राधिकरणका महानिर्देशक इन्जिनियर प्रदीप अधिकारीलाई तत्काल निलम्बन गर्न सरकारसँग माग गरेका छन्।

प्राधिकरणकै कारण हवाई दुर्घटना भइरहेकाले सरकारले जिम्मेवार निकाय र व्यक्तिको रुपमा त्यसको नेतृत्वलाई निलम्बन गरेर सौर्य एयरलाईन्सको विमान दुर्घटनाबारे छानबिन कार्यलाई तिव्रता दिनुपर्ने बताए ।

सोमबार प्रतिनिधि सभा बैठकमा विशेष समय लिएर बोल्दै सांसद जबराले प्राधिकरणले हवाई सेवा सुरक्षाका लागि कुनै प्राथमिकता नदिएको जिकिर पनि गरे ।

विमानको मर्मत सम्भारका लागि बजेटको कमी हुँदा पनि विमानहरु दुर्घटना हुन गएको सांसद जबराको भनाइ थियो ।

उनले भनने,‘अहिलेको डिजीले राजीनामा दिनुपर्दैन ? अथवा डिजीले राजीनामा नदियो भने नेपाल सरकारले अनुसन्धान चलिरहेको बेलासम्म त्यो डिजीलाई सस्पेन्स गर्नु पर्दैन? हामीले यो विभिन्न घटनाहरु हुन्छ। हामी सबैले संसदमा बोल्छौँ । यो बस दुर्घटना होस् कि एयर दुर्घटना होस्, त्यो पछि हामी बिर्सिन्छौँ। एयर सेफ्टीलाई प्राधिकरणले प्राथमिकता दिन सकेको छैन ।’