कोरोना संक्रमितहरू बढेसँगै सरकारले लकडाउन जेठ अन्तिमसम्म बढाउने निर्णय गरेको छ । शनिबार साँझ बसेको मन्त्रिपरिषद बैठकले कोरोना संक्रमण रोकथाम रोक्न जेठ ३२ गतेसम्म लकडाउन लम्ब्याउने निर्णय गरेको हो ।

सरकारले पछिल्लो पटक थपेको लकडाउनको समय यही जेठ २० गते सकिदैछ । कोरोना भाइरस रोकथाम तथा नियन्त्रण उच्चस्तरीय समितिको सिफारिसमा सरकारले लकडाउन लम्बाउने निर्णय गरेको हो । यसबीचमा लकडाउनको मोडालिटी परिवर्तनबारे समेत छलफल गरिने एक मन्त्रीले जानकारी दिए ।

यसका साथै सरकारले विदेशमा अलपत्र रहेका नेपालीलाई उनीहरु रहेको देशस्थित नेपाली दूतावासमा नाम दर्ता गराएर प्राथमिकताका आधारमा स्वदेश फर्काउने तयारी गरेको छ । नेपाल ल्याएपछि काठमाडौंका होटलमा १४ दिन क्वारेन्टाइनमा राखेर मात्र जिल्ला प्रवेश गराउने योजना बनाएको छ ।

विमानस्थल भने असार १३ गतेसम्म बन्द गर्ने सरकारले निर्णय गरेको छ । कोरोना संक्रमण फैलिएको आवश्यक ठाउँमा सेना परिचालन गर्ने निर्णय गरेको छ । मन्त्रिपरिषद् बैठकअगाडि सुरक्षा परिषद् बैठक बसेको थियो । त्यसको सिफारिसअनुसार मन्त्रिपरिषदले निर्णय गरेको हो ।

प्रकाशित समय : ०३:०३ बजे