स्वास्थ्य तथा जनसंख्यामन्त्री पदम गिरीले नर्सहरूलाई काममा लगाएर श्रम शोषण गर्ने स्वास्थ्य संस्थाहरूलाई कारबाही गर्ने बताएका छन् ।

नेपाल नर्सिङ संघको ६१औं वार्षिकाेत्सवका अवसरमा आयोजना गरिएको कार्यक्रममा मन्त्री गिरीले विभिन्न स्वास्थ्य संस्थाको अनुगमन गर्ने र प्रमाणका आधारमा श्रम शोषण गरेको पाइए संस्था नै खारेज गर्ने चेतावनी दिए । उनले भने, ‘प्रमाणका आधारमा संस्था खारेज हुनेछन् । नर्सको तलब पेन्सिलले लेख्ने र पछि मेट्ने गरेको सुनेको छु । अब नर्सको पेमेन्ट डिजिटल हुन जरुरी छ ।’

उनले बिरामीकाे हालत र भोको पेटका कारण नर्सहरू हाँस्नै बिर्सेको समेत उनले बताए । उनले नर्सहरूलाई ‘अनलाइन पेमेन्ट’को व्यवस्था गर्न निजी क्षेत्रका अस्पतालसहित स्वास्थ्य संस्थालाई आग्रह गरे । ‘नर्सहरूले आठ हजार, १० हजारमा पनि निजी क्षेत्रमा काम गर्नुपर्ने अवस्था छ भन्ने कुरा सुनिरहँदाखेरि योभन्दा भयावह र कहालीलाग्दो अवस्था केही पनि हुन सक्दैन । यो अत्यन्तै चिन्ताको विषय हो । म यहीँबाट भन्न चाहन्छु– यसरी न्यूनतम पारिश्रमिक पनि नदिईकन, तलब, भत्ता पनि नदिईकन काममा लगाउने र श्रमको शोषण गर्ने कुरा कुनै पनि मूल्यमा ठिक हुन सक्दैन ।’

प्रकाशित समय : १५:२३ बजे