नेपाली कांग्रेसले सभामुखको निर्वाचनमा सत्तारुढ दलको साथ नपाउने भएपछि विपक्षमा रहेका दलहरूसँग गठबन्धनको प्रयास थालेको छ । सभापति शेरबहादुर देउवाले यसअघि संसद्‍मा रहेका सबै दलसँग छलफल गर्ने र निर्णयमा पुग्ने रणनीति लिएकोमा सभामुखमा सत्तारुढ दलहरूबाट सहयोग हुने सम्भावना कमजोर बनेपछि विपक्षमा रहेका दलहरुसँग छलफल गरेर उम्मेदवारी दिन छलफल थालेका हुन् ।

सभामुखको निर्वाचनका लागि बुधबार उम्मेदवारको मनोनयन दर्ता गर्ने कार्यक्रम छ । देउवाले त्यसबारे मंगलबार बिहान आफ्नै निवासमा पार्टीका पदाधिकारी र पूर्वपदाधिकारीहरूसँग छलफल गरेका थिए ।

छलफलपछि प्रवक्ता प्रकाशशरण महतले सभामुखको निर्वाचनमा आफैं उम्मेदवारी दिने वा कसैलार्ई समर्थन गर्ने भन्नेबारे छलफल भइरहेको बताए ।

बैठकमा विपक्षमा रहेका दलहरू नेकपा एकीकृत समाजवादी, जसपा, लोसपा, नागरिक उन्मुक्ति पार्टीसहित दलहरुसँग छलफल गरेर सभामुख र उपसभामुख पदमा तालमेल गरेर उम्मेदवारी दिनेबारे छलफल भएको थियो ।

प्रकाशित समय : १२:२२ बजे